‘Tulisan’ gipusil patay

CEBU, Philippines - Usa ka lalaki ang gipusil patay sa wala mailhing mga lalaki diha sa Brgy. Poblacion, Ward 4, Minglanilla niadtong Sabado sa gabii.

Ang biktima mao si Ompong “Bongbong” Tan, 38, residente sa Relis, Tulay, Minglanilla nga nakaangkon og samad pinusilan sa iyang dughan ug nakabsan sa iyang kinabuhi samtang gitabang sa tambalanan.

Matud sa desk officer sa Minglanilla Police Station nga si Police Officer 1 Mary Christine Nacario nga nahinabi sa Banat News adunay lima ka samad pinusilan  ang biktima ug nagbuy-od na kini sa yuta dihang nakaplagan sa mga residente.

Ang biktima gisuwayan pagdala sa Minglanilla District Hospital apan matud pa nakabsan kini sa kinabuhi.

Base sa gihimong imbestigasyon sa grupo nila ni PO3 Alfredo Pagaling , gikan nakig-inom sa mga higala ang biktima ug padung na untang mopauli dihang kini gipusil.

Gisusi pa karon sa kapolisan ang report nga giingong nalambigit sa mga pagpanulis ang biktima ug maoy gidudahang motibo sa pagpatay niini. (BANAT NEWS)