Sikad driver tusak sa bala

CEBU, Philippines - Patay ang trisikad driver human pusila alas 7 sa niagi’ng gabii sa Intramuros Road, Poblacion, Lungsod sa Cordova.

Natusak sa bala ang biktima nga si Junifer Rosagara, 29, human siya gipaulanan og bala sa wala mailhi’ng mamumuno.

Base sa imbestigasyon sa Cordova Police Station nga ang biktima nag-drive sa trisikad nga giluwanan sa iya’ng asawa.

Kalit lang may nitapad nga motor ug nihunong sa wala nga bahin dungan ang pagbunot sa armas sa angkas niini ug nipusil sa biktima walo ka higayon.

Natusak sa nagkalainlaing parte sa lawas ang biktima hinungdan nga natagak sa trisikad ug namatay.

Gidudahang may kalambigitan sa ilegal nga drugas ang biktima kinsa gikataho nga wala kini kabayad sa iya’ng financier base sa pamahayag sa iya’ng asawa nga si Almera.

Samtang nakaplagang naglutaw sa dagat nga wala na’y kinabuhi ang usa ka lolo pasado alas 8 sa niagi’ng buntag sa Gilutungan, Lungsod sa Cordova.

Giila sa iya’ng pag-umangkon ang namatay nga si Jorge Nacua, 73.

Wala’y nakita nga foul play sa kamatayon sa tiguwang ang kapolisan. (BANAT NEWS)