EDITORYAL - Pilipinas angay motabang

Dunay nahitabong trahedya karon sa Tainan, sa nasud sa Taiwan human kini gitay-og og 6.7 magnitude nga linog. Ang Taiwan anaa kanunay sa kiliran sa Pilipinas matag adunay mga moigo nga katalagman dinhi kay dali kaayo silang mopadala og hinabang.

Daghang mga buildings ang nangatumba ug daghang mga tawo ang gituohang na-trap sa sud niini nga kinahanglang matabangan sud sa 72 ka oras o tulo ka adlaw alang sa mga buhi pa.

Daghang mga Pilipino ang nanarbaho didto sa Taiwan ug posibleng adunay mga Pilipino nga nagpuyo sa Tainan nga naapil sa mga naapektahan nga kinahanglang tagdon sa atong gobiyerno.

Ang nahitabo sa Taiwan angay panaminan sa mga Pilipino ilabi na niadtong 2013 dinhi sa Central Visayas partikular na ang nahitabo sa Bohol dihang gitay-og kini og 7.2 magnitude nga linog.  Ang kadaot nga gibilin sa linog sa Tainan, dili matandi  ang kagrabehon sa nahitabo sa Bohol ug dinhi sa Sugbo  niadtong 2013.

Bisan mas hinay ang pagtay-og didto sa ila, apan tungod sa nangagupok ug nangatumba nga mga buildings nga adunay daghang mga tawo sa sud posibleng daghan ang nakalas ug liboan usab ang nangaangol nga ang uban nanga-trap pa sa ilawom.

Ang Pilipinas maoy labing duol nga nasud sa Taiwan, unsa kahay plano karon sa gobiyerno aron matabangan ang silingan natong nasud?

Maayo unta kun abtik usab kitang mopadala og tabang  kanila sama sa kaabtik sa mga Taiwanese pagtabang kanato.  Angay pud kitang mobati sa panahon sa ilang kalisdanan kay wala baya pasagdi sa international community ang Pilipinas dihang kini naigo sa mga katalagman. Panahon karon sa pagtinabangay, ug ang labing maayong buhaton sa Pilipinas mao ang pagboluntaryo pagpadala og mga rescue teams , medical supplies, mga doctor, nurses, ug uban pa didto sa maong nasud.

Dili unta magdiki-diki ang gobiyerno pagtabang kay mabati ang imahe sa Pilipinas kun di kini magpakabana sa silingang nanginahanglan.