Resbak

Gula 9

"Ayaw sige'g bugal-bugal diha. Ikaw roy maka-kate sa akong kalagot  kang Larry." Matud pa ni Carlo nga mingislo ang nawong,  miaksiyon og kaisog ug giatubang si Pikot.

"Kalma lang gud brad. Ikaw ay... init kaayo ka'g ulo dah." Matud pa ni Tribor nga mipakalma kang Carlo nga hinay'ng mihapak sa abaga ni Carlo.

"Kahibawo ko asa na siya mag-agian. Atngan nako siya sa may eskina sa dili pa siya maabot sa atanganan niya'g jeep paingon sa ila. Mingaw na dihang dapita. Kamo, audience lang mo ha. Tan-awa ninyo kun unsaon nako pagbokbok si Larry." Matud pa ni Carlo.

Naglami ang ilang inom, napun-an pa kini’g duha ka botelyang beer. Medyo nanginit na si Carlo, misamot ka aresgado ug desidido sa buot niining buhaton kang Larry. Kay dili man layo ang ilang nahimutangan sa eskwelahan, nabati nila ang bagting sa eskwelahan, nagpasabot nga mamuhi na. Dali silang mibarog. Hapit nang mokilom-kilom, naabot sila sa dapit nga maoy atngan ni Carlo kang Larry. Wala masipyat, nakita na ni Carlo si Larry nga nagpaingon sa iyang nahimutangan. Nagpakumo na si Carlo, gibaid ang tuong kumo sa wala niining palad, senyales nga andam na ang pagresbak niya ngadto kang Larry.

Dihang duol na si Larry sa nahimutangan ni Carlo, dali kining mipasalipod  sa poste. Samtang ang tulo niya ka kauban nga sila si Pikot, Tribor ug Vincent, mipwesto sa dili kaayo layo.

Naghuwat usab sa sunod nga mahitabo. Dihang duha na lang ka dupa ang gilay-on ni Larry sa maong poste nga misalipod kang Carlo, miguho ang lalaki. Medyo nakurat si Larry.

"Carlo?!" Bugtong pulong nga nalitok ni Larry ug ang sunod nga nahitabo, mitugpa sa apapangig ni Larry ang kumo ni Carlo. Laing paghunat sa kumo ni Carlo ug naigo sa pikas apapangig ni Larry hinungdan sa pagkasarasay niini.  Sa dili kaayo layo, may ubang mga estudyante nga nagpaingon sa ilang nahimutangan, nakita ni Carlo nga miagulo sa kasakit si Larry. Sa huna-huna usab ni Larry wa gyud siya’y bawot ni Carlo kay taas pa man ni niya. May gitas-on lang nga 5'4' si Larry, niwangon pa. Samtang si Carlo, taas ug medyo muscle-lon sad.

"Unsa may akong sala nimo, Carlo?" Pangutana pa ni Larry nga nagping-it sa kasakit ug nagpanghikap sa natugpahan sa kumo ni Carlo.

"Dako kaayo ka’g sala nako!" Matud pa ni Carlo dayong gisikaran ang kilid makaduha ug misagunto ang pobreng Larry. Tungod kay duol na lang ang grupo sa mga estudyante sa ilang nahimutangan, daling miduol kanila si Vincent.

"Brad, eskirda na. Naa ang uban natung mga classmates nagpadulong diri ug naa sab si Marissa. Dali, sibat na!" Matud pa ni Vincent. Sa pagkadungog ni Carlo sa pagpahibawo ni Vincent, dali kining misibat, mipaingon sa nagpwesto sa unahan nga sila si Pikot ug Tribor. Naghangos ang duha sa pagdinagan.

"Unya, kita na mo kun giunsa nako si Larry?" Matud pa ni Carlo.

"Wala intawoy bawot nimo si Larry brad. Aresgadoha gyud nimo oy." Matud pa ni Pikot.

"Kulang pa to!" Matud pa ni Carlo nga giluto ang mga tudlo sa kamot.

"Aw, naa pa diay second chapter adto?" pangutana pa ni Tribor.

"Oo, Brad. Kulang pa to. Wala ko matagbaw." Matud pa ni Carlo.

"Brad, tan-awa ang nahimutangan ni Larry, gidugok siya sa ubang mga estudyante," matud pa ni Vincent.

"Ayay brad, gi-alalayan man ni Marissa si Larry." Matud pa ni Pikot.  Sa nakita ni Carlo, mihiyong ang mga mata niini, nangunot ang agtang, daw nagselos sa gibuhat ni Marissa kang Larry. (Sumpayan)