Paspasay nga suspenso
Gipakaingon sa mga Sugbuanon nga labihang paspasa ni Cebu City Mayor Mike Rama nga nakapauli sa Sugbo gikan sa Paris aron pag-atubang sa suspension order nga giluwatan sa Malakanyang batok niya. Bisan si Konsehal Dave Tumulak nipahibawo sa Arangkada sa DYAB Abante Pa, Bisaya! gahapon nga niuna pagbiya si Rama sa ilang gitambongan nga mga tigom sa climate change niadtong Martes.
Apan lahi ang istorya sa mga dumadapig ni Rama nga nahibilin sa City Hall. Matud nila bisan sa wa pang suspension order gikatakda na gyong daan nga mahibalik si Rama sa Sugbo gahapon aron pagtambong sa pag-abli sa Robinsons Galleria sa North Reclamation Area sa Dakbayan sa Sugbo.
* * *
Mas abtik hinuon ang Department of Interior and Local Government (DILG) sa pag-serve sa suspension order batok ni Rama. Gawas kun makakuha ang mga abogado sa City Hall og temporary restraining order (TRO) gikan sa Court of Appeals (CA), si Bise Mayor Edgar Labella magpabiling mayor bisan nahibalik na siya gikan sa Paris.
Hangtod sa akong pagsuwat ini, wa pang kaluwat og pamahayag si Rama mahitungod sa iyang pagka- suspenso. Wa mahinayon ang gitakda untang press conference sa iyang buhatan. Iyang alyadong mga barangay kapitan ang niatubang sa media pagpadayag sa ilang hingpit nga suporta ni Rama ug pagbatok sa giisip nga politikanhong maniobra sa Liberal Party (LP).
* **
Makadasig sa kampo ni Rama ang susamang kaso ni kanhi Makati City Mayor Junjun Binay. Gipatigbabaw sa Korte Suprema ang gahom sa CA pagsubli sa suspension orders nga giluwatan sa Ombudsman. Moinsistir ang mga abogado ni Rama nga mahimo sang isalikway sa CA ang suspension order gikan sa Malakanyang.
Nahibawo na hinuon ta unsay nahitabo ni Binay. Tungod sa kadaghan sa mga kaso batok niya ug sa iyang amahan nga si Bise Presidente Jejomar Binay, nalutsan siya og laing suspension order ug nataktak pa gyod sa katungdanan. Gawas sa kasong administratiba nga gipasaka ni Labangon Barangay Captain Vic Buendia, may lain pang mga kaso nga giatubang si Rama sa Malakanyang ug sa Ombudsman.
* * *
Samtang nagreklamo si Buendia ug iyang abogadong si Ben Militar sa kadugay sa Malakanyang pagluwat og preventive suspension order, may sukaranan sab si Rama nga motiyabaw nga siya ra ang giapiki sa administrasyon. Di siya kinahanglang molantaw og layo pagpangita og ikatandi nga kaso.
Mas unang naluwatan og suspension order si Lapu-Lapu City Mayor Paz Radaza niadtong Oktubre tungod sa kaso sa pork barrel ni kanhi kongresista Clavel Asas-Martinez sa Girl Scouts of the Philippines (GSP). Apan hangtod karon, duha ka buwan na human luwati sa Sandiganbayan ang kamandoan, wa pa gihapon masuspenso si Radaza. Tungod ba kay LP si Radaza ug United Nationalist Alliance (UNA) si Rama?
- Latest
