Hagawhaw sa Pasko

Usa ka adlaw, naagian ni Gido si Marmar.  Gikan siya sa iyang trabaho didto sa barangay Pusok dakbayan sa Lapu-Lapu isip mekaniko sa maong dapit. 

Human sa duha ka oras nga pagpanaygon, didto na kini  nagyampungad sa tindahan ni Insi Puring, nagkayungit ang sinultian niini tungod sa kadaghan na sa iyang nainom. Nitaya usab kini og masiao.

Lumad nga taga Mindanao si Gido,ug karon ania na sa Cordova manimuyo human naminyo. Ganahan siya nga magdayandayan sa iyang balay. Pun-on gyud niya Christmas light ang iyang nataran hinungdan nga balik balikan siya sa mga manaygonay sa pagtuo nga adunahan siya.

"Maayong Pasko Sir," sa mga bata nga nagpanon sa pagpanaygon. "Maayong Pasko usab," tubag ni Gido. Gikuot ni Gido ang iyang bulsa ug nitunol sa lima ka piso nga sinsilyo apan human sa iyang paghatag kalit na high blood si Gido tungod kay gikantahan siya sa mga bata og thank you, thank you, pagka tihik nimo.

Sukad niadto dili na mohatag si Gido sa mga manaygon diha sa iyang balay.

Unya usa ka tigulang lalake ang nagkalo nanaygon sa balay ni Gido igo lang niyang gilili ang maong tawo. Wala siya makaila gumikan sa kalo. Nilakaw ang tawo nga hoyhoy ang duha ka mga abaga.

Nagkagubot ang mga tawo kay nadasmagan og taxi ang lalaki. Nakonsensiya si Gido hinungdan nidagan siya paingon sa manaygonay nga nagkadugo ang ulo samtang maayong pagkahapla tunga sa kalsada.

"Noy, nganong wala ka nagbantay?" ni Gido nga nakalitan sa hitabo.

"G-gusto, l-a-n-g ko ma-masko sa a-kong A-N-A-K D-ong," tubag sa tigulang nga nagkanguhal na ang sinultihan. Giwaling ni Gido ang tawo aron sakwaton aron dalhon sa tambalanan. Dinhi nahisinggit siya!

"Papa Ramon! Ikaw kini!!! Nasugat sa duha niya ka mga mata ang panagway sa iyang amahan nga nabulit sa daghang dugo. Nidag-om ang langit unya kalit ningitngit ang kalibutan ni Gido ug sa iyang pagkahimatngon mao na lay iyang nabati ang hagawhaw sa himatyong niyang amahan.

"Maayong Pasko D-ong Gido," matud sa iyang amahan, dayon bugto sa kinabuhi niini. (Katapusan)