Kampanya batok dengue gipadayon
CEBU, Philippines – Gipadayon sa Barangay Pajo, Dakbayan sa Lapu-Lapu ang misting sa matag sitio human sa kamatayon sa 13-anyos nga tinun-an tungod sa dengue.
Matud ni Barangay Kapitan Junard Chan nga Oktubre pa nagsugod ang misting, pagpamutang og kemikal sa mga nagpundo nga tubig ug pagbutang og chemical solution sa mga kurtina.
Ang kamatayon sa bata ang nagtukmod sa barangay nga ipadayon ang kampanya batok sa dengue.
Matud ni City Health Officer Rodolfo Berame nga ang mga anti-mosquito solution nga gibutang sa kurtina luwas sa mga bata.
Apan matud ni Chan nga ang pagpanglimpyo sa palibot mao gyud ang gikinahanglan aron malayo sa sakit nga dengue.
Gipahibawo ni Chan sa mga konstituwente nga aduna’y libre nga anti-dengue kit sa Barangay Health Center nga kung paliton mokantidad kini og P2,000.
Matud ni Chan nga ang bata nga namatay ang labi’ng una nga nakabsan sa kinabuhi tungod sa dengue. (Christell Fatima M. Tudtud/GMR)(BANAT NEWS)
- Latest
