Mobalik ka ra sa payag

Nahuman na sa pagdaro si Itok sa iyang darohan. Tingali, nakaluto na karon si Edith sa ilang panihapon. Usahay ra ba, mora’g tapolan ang iyang asawa magluto. Dili niya kini mabasol kay dato ang kagikan ni Edith. Ug nahitabo lang nga mikuyog kini kaniya sa bukid kay may gilikayan didto sa ilaha.

Gusto man god nga ipakasal si Edith sa iyang papa ug mama ngadto sa lalaki nga wala niya higugmaa, ug kay wala may gusto ang dalaga sa maong lalaki nga si Rommel, milayas kini dala ang pipila niya ka mga gamit. Apan, demalas kay dihang duol na sa tulay ang gisakyan nilang bus, gipara sila og mga armadong tawo. Gidala si Edith kay naibgan sa usa sa mga armadong tawo. Ug dihang miabot na sila sa halayong bukid mihilom og sibat si Edith, ug kay wala pa masuheto sa bukid maong nahisangko siya sa payag ni Itok ug giabi-abi siya sa ulitawo.

Ug dinhi magsugod ang maayong relasyon sa duruha. Si Edith naluoy kang Itok apan wala siya’y gugma niini. Dili niya tipo ang pagka lalaki ni Itok. Apan sa gidugayon sa iyang pagpuyo kuyog kang Itok, nakat-on siya sa pagmahal sa ulitawo. Usa ka gabii, naangkon ni Itok ang pagka babaye ni Edith. Mitulo ang luha sa dalaga apan wala na siya’y nahimo, pusgay na ang iyang kaputli niining lalaki nga bukidnon.

Pag-abot ni Itok sa payag wala na si Edith. Gibiyaan siya. Ug wala niya kini ikatingala kay sayod siyang buhaton gyod kini ni Edith. Apan nagtuo si Itok nga mobalik ra si Edith dinhi sa iyang payag.

Usa ka hapon may misangpit kang Itok ug sa paglingi pa niya maoy mibantang sa iyang panan-aw si Edith. Dako na ang tiyan niini.

“Itok, nia mibalik ko, kay gusto ko nga dunay matawag nga amahan kining akong gimabdos...” kahilakon si Edith.

Miduol si Itok sa babaye nga iyang gimahal ug gigakos.

“Salamat,” mubong tubag ni Itok. (Katapusan)