AC Troopers vs. Rostata sa laba President’s Cup finals
CEBU, Philippines – Milampos sa ilang misyon ang AC Troopers ni SPO4 Dondon Coloscos dihang milusad kini og linuog nga pangataki sa Top V sa second half aron moiskor og dakung kadaugan sa semifinals, 54-42 ug ingon man makuha ang katapusang luna sa finals sa second conference sa LABA President’s Cup basketball tournament sa miaging gabii didto sa Banilad Sports Center, Mandaue City.
Si Pedot Dakay maoy nakahatag og dakung danyos sa Top V dihang miluthang siya og 16 puntos aron pangulohan ang AC Troopers. Ang team owner ug playing coach nga si Coloscos mipusil og 15 puntos. Silang Dakay ug Coloscos pareho mitipi og tulo ka 3-pointers.
Human biyai sa halftime, 24-31, ang AC Troopers mipatuman og hugot nga depensa ug igo lang nila gipaiskor og kuwatro puntos ang Top V sa tibuok kuwarter aron mailog ang labaw, 38-35.
Misikit ang Top V sa katapusang higayon, 42-43 sa nahabiling tres minutos sa fourth quarter apan naungot ang ilang iskor ug wala na moirog hangtod nahurot ang oras sa duwa.
Si Geryl Bukiron gilimitahan lang ngadto sa 10 puntos, apan siya gihapon ang topscorer sa Top V
Sa laing aksiyon, ang Rostata ni Glen Rostata nidaog sab batok sa Monterroyo ni Dr. Raul Monterroyo, 63-57 sa pagpangulo nilang Dongkoy Catinoy ug Renzen nga nagkumbinar og 21 puntos. Ang Monterroyo gipangulohan ni Tawing Grafe sa iyang 21 puntos, gisundan ni Rex Gonzaga nga adunay 13 puntos.
Ang mga duwa nga gipasiugdahan sa LABA ubos sa liderato ni konsehal Gilbert Sebandal, gipadagan ni league commissioner Geryl Bukiron inabagan nilang Adie Cinco ug Lloyd Chavez, ingon man nilang Allan Recla, Chang Tejero, Arman Gonzaga, Henry Fontanoza ug Arjan Wenceslao. (BANAT NEWS)
PUNTOS MATAG USA
Unang duwa:
ROSTATA (63) – Catinoy 11, Renzen 10, Dawal 9, Rostata 8, Monsanto 7, Ocier 7, Acusar 5, Lamparas 4, Jacalan 2.
MONTERROYO (57) – Grafe 21, Gonzaga 13, Hatamosa 6, Lepon 4, Cabucos 4, Ecot 3, Ramos 3, Bontilao 2.
Ikaduhang duwa:
AC TROOPERS (54) – Dakay 16, Coloscos 15, Jacalan 9, Englis 6, Migallen 4, Beldera 2, Cabahug 2.
TOP V (42) – Bukiron 10, Rizane 7, Puerto 6, Arceo 5, Lagaras 4, Magale 2.
- Latest
