Hot meat nasakmit
CEBU, Philippines - Nasakmit sa taga Talisay City Veterinary Office ang 70 kilos nga gituohang hot meat gikan sa merkado sa Tabunok human nasakpan nga wala kini ihawa sa ihawan sa siyudad ug dili luwas kan-on sa tawo. Ang operasyon gipangulohan ni Dr. Santiago Hortel ug gisakmit ang mga karneng baboy nga gipanag-iya ni Randy Ocampo.
Matud pa ni Hortel nga wala moagi sa slaughterhouse sa siyudad o bisan asa nga mga accredited abattoir ang maong mga karne mao nga wala kini moagi og checkup sa beterinaryo ug dili masiguro kun wala kini sakit. Si Hortel nagkanayon ang pagkaon og karne nga wala moagi og tan-aw sa mga beterinaryo posibleng maoy mamahimong hinungdan sa sakit sa makakaon.
"Kinahanglan gyud na nga i-agi sa saktong proseso aron safety sa tanang tawo nga mokaon sa karne," matud pa ni Dr. Hortel.
Gibutyag niya nga aduna pay laing mga gipanid-ang tigbaligya og karne sa merkado sa Tabunok nga pasekretong nisagol og karne sa ilang mga gibaligya nga wala mag-agi sa ihawan sa siyudad.
Ang mga karneng anha giihaw sa ihawan sa siyudad adunay tatak gikan sa mga meat inspectors nga nagsigurong luwas ug baskog ang mananap nga giihaw. (Gabriel Bonjoc/EIM)(BANAT NEWS)
- Latest
