EDITORYAL – Tamang panahon

Gikan sa karsada nga gitawag og kalyeserye ngadto sa Philippine Arena sa Bulacan gihiusa sa Eat Bulaga ang katawhang Pilipino pagbalik-lantaw sa mga tradisyon ug kultura nga hinay-hinay nang nakalimtan sa bag-ong henerasyon.

Gipakita sa Eat Bulaga ug sa mga tawong nagpaluyo sa maong nisikat na og maayong segment ang pagtulon-an sa “pagpaabot ug pagpailob” kun duna kay gustong makab-ot sa imong kinabuhi.

Samtang gitudlo kini sa mga eskuylahan, lahi ra gyud kun kini makita kun unsaon tungod kay madala gyud ang pagbati sa mga nagtan-aw ug maghinam-hinam sa unsa pay sunod nga leksyon nga makat-onan gikan sa Kalyeserye.

Ang maong segment nagpahinumdom sa kabataan ug sa mga tawong nakalimot na sa kinaraan sa kahinam sa pagpanguyab sa paaging Pilipino, puno sa pagsuway samtang nagpaabot nga makuha ang ilang gipangandoy.

Dili lang ang mga Pilipino ang nakakita sa maong segment, kay hasta ang mga langyaw nga sikat nga mga aktor ug aktres sa ubang nasud sama sa Amerika ang nahibulong ug nagpangutana unsa diay ning nag-trending karon sa Twitter ug ubang social networking sites gikan sa Pilipinas.

Nagpangutana sila tungod sa kagrabe sa gidaghanon sa mga followers kay wa sukad sa ilang kinabuhi isip mga artista nakasuway niini, mahimong nasuya sila sa gidaghanon sa nagsunod o naintriga lang gyud kung unsay anaa niini. Ang maong segment angay lang gyud nga ikapasigarbo sa mga Pilipino tungod kay pinaagi niini, nakita sa ubang mga nasud kun unsa kanindot ang kultura nato.

Sumala pa nga na-break sa love team nga Alden Richards (Alden) ug Maine Mendoza (Yayadub) sa Eat Bulaga “Tamang Panahon” Episode niadtong Sabado Oktubre 24, 2015 ang 2004 FIFA World Cup record nga 35 million Tweets pinaagi sa ilang 41 million Tweets. Butang nga angay gyud ikalipay sa mga Pilipino tungod kay bisan diay sa kamoderno na sa panahon karon, ang kulturang Pilipino pabiling buhi.