Melindo, Villanueva mobangon
CEBU, Philippines - Nanghinaut ang mga pambato sa ALA Boxing Gym nga sila si Milan ‘El Metodico’ Melindo ug ‘King’ Arthur Villanueva nga makabangon gikan sa ilang kaparotan sa ilang pakigsangka batok sa dekalibreng Mehikanong mga kontra sa “Pinoy Pride 34: Back with a Vengeance” fight card karong Nobiyembre 28 didto sa Hoops Dome sa Barangay Gun-ob dakbayan sa Lapu-Lapu.
Si Melindo (32-2, 12KOs) makigharong ni Carlos ‘Divino’ Fontes (21-3, 17KOs) alang sa WBO International junior flyweight belt, samtang si Villanueva (27-1, 14KOs) naglaraw nga sakmiton ang WBC International super flyweight title sa iyang pakigsangka ni Victor ‘Spock’ Mendez (19-2-2, 15KOs).
Nagtinguha sila si Melindo ug Villanueva nga makabawi human mapilde pinaagi sa kontrobersiyal nga desisyon sa miagi nilang world title fights.
Ang 27-anyos nga si Melindo napukan pinaagi sa kuwestiyonable nga sixth round technical decision batok ni Javier Mendoza sa ilang IBF light flyweight title bout niadtong Mayo 30 didto sa Campo Nuevo Ensenada sa Baja California, Mexico.
Si reperi Gerald White miundang sa away sa ikaunom nga hugna gumikan kay dili na makatiwas pa si Mendoza human makaangkon og dakung gisi sa ibabaw nga bahin sa tuo niining mata. Ang mga hurado mipadaog ni Mendoza, butang nga gipalagan og maayo sa kampo ni Melindo kay alang kanila si Melindo ang angayan nga ideklara nga mananaog gumikan kay lehitimo man nga kumo ang nakaigo sa nawong ni Mendoza.
Susama sab ang nasinati ni Villanueva, nga mura’g maoy dumadaog batok ni McJoe Arroyo sa Puerto Rico, apan sa kinauwahian napilde kini pinaagi sa kontrobersiyal nga 10th round technical decision sa ilang IBF super flyweight championship match niadtong Hulyo 18 didto sa Don Haskins Convention Center sa El Paso, Texas.
Sa ilang laraw nga makabarog human sa ilang pagkahisukamod, sila si Melindo ug Villanueva angayan nga mangandam alang sa usa ka dakung gubat gumikan kay ilang atubangon pulos man lig-on nga Mehikano nga dunay mabug-at nga mga kinumo.
Si Fontes lab-as nga mihaw-as gikan sa duha ka sunod-sunod nga daog pinaagi sa knockout, samtang si Mendez mikolekta og lima ka sagunson nga daog karon tuiga diin tulo sa iyang mga biktima iyang gipalukapa. (BANAT NEWS)
- Latest
