USJ-R karatekas misidlak
CEBU, Philippines - Ang mga tang-an nga karatekas sa University of San Jose-Recoletos (USJ-R) misidlak og maayo human mihakot og 26 ka gold, tulo ka silver ug tulo ka bronze medals sa Negros Oriental Buglasan Open Invitational Karatedo Championships niadtong Domingo didto sa Lamberto Macias Sports Complex sa Dumaguete City.
Misamot katam-is ang natagamtaman nga kalampusan sa USJ-R ubos ni coach Manuel Alob gumikan kay siyam lamang sila ka buok, apan nakamaneho pa sila paglangkat sa kampiyonato sa maong torneyo.
Nangu sa gihimong pagratsada sa USJ-R mao si Felix Calipusan nga mikabkab og lima ka bulawang medalya. Si Dj Mae Dente, nga gibansay-bansay ni Larry Avila, mihakot og upat ka golds ug usa ka silver.
Sila si Marianne Andales ug Aubrey Codilla mihipos og tag-upat ka golds, samtang si Pete Rayos mitunol og duha ka golds.
Daku sab og naambag sa ilang kawsa mao sila si Jeb Miramontes nga dunay duha ka golds ug usa ka silver, si Matthew Beronque nga mitipig og duha ka golds ug usa ka bronze, si Jeremy Nopre nga miangkon og tulo ka golds ug usa ka silver ug si Nnyl Jake Rayos nga adunay usa ka silver ug usa sab ka bronze. (BANAT NEWS)
- Latest
