Presyo sa kandila gi-monitor na

CEBU, Philippines - Karon pa lang, ang Department of Trade and Industry nagsugod na sa pag-monitor sa presyo sa kandila alang sa adlaw sa kalag-kalag sunod buwan.

Ang kandila gikonsiderar sa DTI-7 nga usa sa nag-una’ng panginahanglanon niini’ng panahona gumikan sa nagsingabot nga paghandum sa mga patay ug santos.

Sugod karon hangtud sa ikaduha’ng semana sa Nobiyembre himuon ang pag-monitor sa presyo sa mga kandila.

Matud ni Dinah Gladys Oro, price monitoring officer sa DTI-7, nga sagad motaas ang presyo sa kandila og 25 sentabos depende sa presyo usab sa mga gigamit nga raw materials.

Hinuon ang gi-monitor ug gi-inspeksiyon kadto lang adunay label nga mga kandila nga gibaligya sa mga dagku’ng tindahan apan kadto’ng gipamaligya gawas sa simbahan ug sam-ang ug mga gagmay'ng tindahan wala giapil tungod kay sagad niini recycled wax ang gigamit.

Samtang sa katapusang bahin niini’ng buwana sugdan na usab sa ahensiya ang pag-inspeksiyon sa mga ipamaligya’ng Christmas lights aron pagseguro nga maayo og kalidad ug dili kuyaw sa sunog.

Pahimangno sa DTI-7 nga kung mahimo dili mopalit sa mga Christmas lights nga ipangbaligya nga buy 1 take 1 lakip na ang 3-for-P100 ug susihon gyud kun may ICC sticker.

Sukad Agusto hangtud Septiyembre, gitug-an ni Oro nga wala’y nahitabo’ng pagsaka sa presyo sa mga basic commodities sa kamerkaduhan.

Gipaabot nga sunod buwan mopagawas ang DTI central office og presyo alang na sa mga noche buena products. – /GMR) (BANAT NEWS)