Maestro gi-ambush

CEBU, Philippines – Patay ang usa ka 33-anyos nga maestro human kini gibanhigan samtang sakay sa iyang motorsiklo gikan nanari pag-abot diha sa Brgy. Panadtaran sa lungsod sa Argao sa nakalabay nga hapon.

Ang biktima naila nga si Allan Albert, taga Brgy. Usmad sa maong lungsod ug grade 5 teacher sa Usmad Elementary School. Ang mamumuno giingong nagsakay ‘sab og motorsiklo nga nagsunod sa biktima.

Ang hepe sa Argao Police Station nga si Senior Inspector Alejandro Batobalonos nga nahinabi sa Banat News miingon nga gikan sa Talaga Cockpit Arena sa Brgy. Talaga ang biktima diin kini nanabong.

Apan sa pagpauli na niini ug pag-abot sa maong dapit kalit kining gipusil sa likod sa lalaking nagmotor nga nagsunod kaniya hinungdan nga kini nasukarap sa kilid sa kalsada ug didto kini gitiwasan pagpusil sa nawong.

Nagduda si Batobalonos nga dul-it ang pagpusil sa nawong sa maestro kay nasunog ang nawong niini ug dunay powder burns.

Nagduda ang mga imbestigador nga personal ang motibo sa kriminal ug gituohan usab nga gun for hire ang mihimo niini.

Naghipos na sila og dugang mga impormasyon nga makatabang pagtumbok kinsay mga nakabikil sa biktima sa buhi pa kini.

“Testigos ang atong gipangita ani karon para malig-on ang atong kaso, at least naa nata’y lead sa kaso,” matud pa ni Batobalonos.

Gisubay na ‘sab sa kapulisan ang giagian sa biktima og duna ba’y close circuit television (CCTV) sa posibilidad nga nakuhaan og video ang mga kriminal nga makatabang sa ilang imbestigasyon.

Duha ka basiyo sa bala sa .45 caliber nga armas ug usa ka slug ang nakuha diha sa crime scene. – /EIM) (BANAT NEWS)