Pasagad pananom og kahoy

Sa kanhiay’ng panahon, ang kadagkuan sa gobiyerno, aron pagpatahom sa atong kadalanan ug paghatag og landong sa katawhan, nananom og mga kahoy, aron mahimong livable ang Sugbo.

Daku ang atong pasalamat sa ilang gihimo. Apan, ang problema mao nga wala sila maka-anticipate unsay mahimo sa maong mga kahoy, 10, 20, or  50 years after. Wala’y planning, nagpasagad lang … wala masulod sa ilang hunahuna kun  maka-serve pa ba sa ilang katuyoan ang maong mga kahoy.

In fairness, kanang mga kahoy anaa sa kanhi Jones Ave., giingon nga gitanom sa mga Amerikanhon,  duna gihapoy kapuslanan, tungod kay halayo ang ilang mga panglantaw; sayud sila nga 50 or 100 years gikan sa ilang pagpananom sa kahoy, ang maong mga kahoy dili makasamok sa katawhan, ug dili makapapugong, dili makapakgang sa kaugmaran.

Apan, daghan kaayong dapit sa atong dakbayan ug lalawigan, nga ang mga kahoy nahimo nang problema, wala na maka-serve sa ilang katuyoan. Nahimo nang traffic hazard, naghatag nag kakuyaw both sa pedestrian ug sa mga motorista.

Maoy hinungdan, dili na ma-beautiful ang maong mga trees, dili na lovable, nga kun pamutlon na kini o ibalhin o i-earthball ngadto sa more appropriate nga lugar, magpabilin gihapon nga livable ang lalawigan ug dakbayan sa Sugbo.

We all love trees. Apan, kun makahimo na kining suliran sa trapiko ug hulga sa kinabuhi, they  have to go. Kay lagi, ang atong katigulangan nga nananom niini, wala magdahom nga maingon na niini karon ang atong dakbayan ug lalawigan.

Mao kini ang nahitabo sa Makati City, diin kapin sa 180 ka kahoy ang gipamutol o gipamalhin gumikan sa mga kaugmaran.  Don't tell me, they don't love the trees as much as we do. And don't tell me nga Makati City karon, dili na livable.

In case, wala makabasa niini ang taga-Livable Cebu Movement, atong kutloon kining napatik sa Inquirer: "At least 187 trees had been cut down or earthballed to give way to road-widening project that would link the Makati Central Business District to a development of Ayala, Inc."

Ang mihatag og permit pagpamutol mao lang ang Department of Environmental Services sa dakbayan sa Makati. Ambot mahimo ba sad kaha ni dinhi sa atong dakbayan ug lalawigan.  Mao ra man og hadlok ang atong mga local governments, lakip ang DENR, sa mga  Livable Cebu movement ug niadtong running priest. Sige pa ba siya’g dagan ron?