Pista sa bukid - Gula 12

Wala tuyoa ni Kenn nga nakahinuktok siya nga nagpamati sa awit ni Rene Cruz nga ang title -- Wala Na’y Luha. Wala na gani makabantay si Kenn nga adunay gisulti kaniya si Lyn.

Nakabantay si Lyn nga mura’g halawom kaayo ang paghanduraw sa iyang higala.  Layo kaayo ang gipunting sa iyang panan-aw lagbas niadtong naglugitom nga kangitngit samtang nagpamati sa matag pulong sa awit.

“Kenn, naunsa ka uy, kalawom gud nimo og gihuna-huna. Nakasabot na ko, tingali nahimo nga tipik sa imong lovelife ang mao nga awit no?” gisukna siya sa dalaga.

Nakapahiyom og hilaw si Kenn nga milingi kang Lyn. “Bitaw Lyn, bisan dili namo theme song ang mao nga kanta, apan sa iyang mga lyrics, naigo g’yud ko kay ang matuod ko nga gugma ngadto sa akong girlfriend gibugtian ra niya’g pagbudhi.”

“Kalooy ‘sab nimo Kenn uy. Ayaw kabalaka, daghan pa’ng mga babaye nga mahimo nimo nga higugmaon ug nga mobugti usab kanimo og matuod nga pagmahal,” ni Lyn nga mura’g mialam-alam sa higala.

Tungod sa gisulti ni Lyn, mura’g nabalikan sa kadasig si Kenn. “Tungod sa nahitabo nga gibudhian ko sa akong girlfriend, karon mahadlok na ko nga manguyab pag-usab og babaye Lyn,” matud ni Kenn.

“Ayaw, sayop kana ang imong gibuhat Kenn kay dili managsama ang tanang babaye,” ni Lyn nga nagpahiyom. (Sumpayan)