Nanguha’g mais gipusil, gitigbas

CEBU, Philippines - Nalandig sa tambalanan ang magsuon nga lalaki diha’ng gipusil ug gitigbas human gipasanginlan nga nanguha og mais nga anihonon sa sityo Curvada, Don Juan Climaco Sr., dakbayan sa Toledo.

Si Jundy Caniban, 33, ulitawo, nakaangkon og samad pinusilan human gipusil sa usa ka Diano Selgas samtang may samad tinigbasan si Christopher Caniban, 35, kinsa gidunggab sa ginganlan og Mario nga umagad ni Selgas.

Giingong nasuko si Diano diha’ng gikuha ni Christopher ang mga mais hinungdan nga nagbinayloay og kumo ang duha.

Paglabay sa pipila ka minuto, niuli sa tagsa-tagsa ka panimalay ang duha ug nibalik si Diano nga nagdala og armas. Nisuway pagbadlong si Jundy sa suspek nga ibutang ang dala nga armas apan wala mopatuo ug gipusil kini igo sa liog.

Nipalayo si Jundy aron mokuha unta og hinagiban apan ang igsuon nga si Christopher gitigbas usab ni Mario sa baba. Daling gidala sa tambalanan ang mga biktima samtang nisibat ang mga suspek.  (BANAT NEWS)