Yaya Dub nakuyapan gyud diay!

CEBU, Philippines - Kumpirmado gyud nga nakuyapan tinuod si Yaya Dub (Maine Mendoza) atol sa ilang segment kagahapon sa Eat Bulaga diin nagpadayon ang seremonya sa kasal tali niya ug kang Frankie (Jose Manalo).

Nagtuo ang nakakita sa maong eksena nga lakip sa script sa istorya ang pagkahagba ni Yaya aron dili mahinayon ang kasal niini sanglit kang Alden Richards siya gitakda gayud nga makadayon.

Apan nasabtan nga tinuod ang nahitabo dihang nagkagubot ang mga production staff nga nidali pagduol kang Yaya, may nipaypay pa gani niini. Nisamot ang pagtuo sa publiko nga dili komedya lang ang eksena dihang gitawag ni Lola Nidora  (Wally Bayola) og Maine, Maine si Yaya samtang iya kining gitabang.

Wala na gayud nilihok si Yaya hinungdan nga gipagawas kini sa lugar diin gihimo ang seremonya sa kasal, ug gikarga og stretcher.

Ug pagkataod-taod niabot si Alden sa venue, apan wala na igkita pa si Yaya kay gidala na diay kini diretso sa tambalanan.

Nasayran nga daghan ang nagtuo kagahapon na gayud hingpit nga magkita unta sila si Yaya ug Alden aron mahatagan na og katumanan ang dugay na nga gipaabot nga eksena sa mga fans sa AlDub sa ilang sikat nga “Kalye Serye.”

Mismong si Alden nagtuo nga gahapon na gyud unta sila magkita.

Gani ni-tweet pa siya og, “Akala ko eto na yung tamang panahon. Get well soon @mainedcm.”

Nasayran nga sayo pa lamang kagahapon sa buntag dili na gyud maayo matud pa ang gipamati ni Yaya base usab sa duha niya ka mga tweets sa wala pa siya nakuyapan.

“Hilo pa more” ug Woke up feeling extremely weak today..Pati yung system ko nawalan ng gana sa ganap mamaya”, ang duha ka mga tweets ni Maine.

Hinuon gipadayag ni Alden sa Startalk kagahapon nga okay na ang kahimtang ni Yaya o Maine.

Samtang gipakpakan sa publiko sila si Alden, Wally, ug Jose ug kinatibuk-ang produksyon sa Eat Bulaga gumikan kay bisan og nakita nga nagyagaw sila kadali, gipadayon gihapon nila ang istorya sa kalye serye, pinaagi sa dali nga pagmugna og mga eksena aron matabunan ang tinuod na diay nga panghitabo.