Pagpanggukod na ni?

Husto ba gud ang gihimo sa mga tawo nga nagsakay sa SRP Police patrol car nga gipang-abog nila ang mga mo-parking atubangan sa gimugna nga SRP Farmer’s Market diha sa Barangay Mambaling niadtong Biyernes sa hapon?

Usa ka vendor mitawag nako ug gisumbong ang gihimo sa mga traffic enforcer nga nagsakay-sakay niining SRP Police patrol car. Klaro na man kini nga pagpanggukod.

Tinuod, gidili ang pag-parking daplin sa mga karsada, apan lapad man kaayo ang karsada diha ug dili makabalda sa pag-agi sa mga sakyanan. Dili usab kaayo daghan ang moagi diha.

Klaro na man gud kaayo nga gusto g’yud ang kadagkoan sa Cebu City Hall nga dili molambo ang Farmer’s Market diha sa entrada nga bahin sa Mambaling Access Road paingon sa SRP.

Una, nasayod sila nga si kanhi Kongresista Tomas R. Osmeña ang nagpasiugda sa mao nga Farmer’s Market. Ikaduha, naghimo dayon ang City Hall og “opening” sa tabo nga gitawag nila’g tugbong sa City Hall grounds.

Pastilan, kadugay ra ana nga kada Sabado, aw bisan gani dili Sabado, adunay gitugotan nila nga maninda diha, unya karon lang g’yud nga naghimo’g opening?

 Kanang Plaza Sugbo dili man g’yud unta kana angay’ng himoan og tabo kay wala na man gani itugot ang pag-parking sa mga sakyanan diha, unya himuon na hinuon nga market?

Apan sagdi na lang, mas nindot nga daghan ang mga dapit nga mapalitan nato og barato nga baligya. Apan dili lang unta itugot nga adunay mamaligya og mga sinena diha sa Plaza Sugbo.

Kinsa ba kadtong nagsakay sa SRP Police patrol vehicle niadtong Biyernes? Ayaw kaayo estriktoha ninyo ang mga mopalit og lagutmon ug prutas diha sa Farmer’s Market kay dili man kana sila magdugay.

* * *

Suporta ko sa bag-ong balaod nga dakpon na g’yud ang mga magmaneho og motorsiklo nga mopasakay og gagmay pa kaayo’ng mga bata.

Maluoy g’yud lagi unta ta, apan alang kini sa kaluwasan sa mga bata. Unya, angay gayud nga dakpon kadtong mga drayber sa motor nga mopaangkas nga walay crash helmet.

Ang amigo nako nga si Konsehal Richie Osmeña maoy nakapahiamgo nako nga pasul-ubon g’yud og helmet ang bata. Kaniadto, kun mopaangkas ko’g bata, walay helmet. Dili g’yud diay kini husto.

Kun magsul-ob kitang dagko og crash helmet, sama sa mama ug papa, unya ang atong gagmay’ng anak wala, sama ra nga mosugot kita nga mabuak ang ulo sa atong mga anak!