EDITORYAL – Serbisyo nga matinud-anon

Ang mga kabus nga pasyente nga nanginahanglan og tabang sa kagamhanan sa dakbayan sa Sugbo angayan nga serbisyohan sa tanang higayon aron sa pagpakita sa sinsero nga pangalagad sa atong mga opisyal.

Ang dakbayan sa Sugbo migahin og subra sa P100 ka milyon ka pesos nga kantidad aron gastuhon sa pagtabang sa mga lumolupyo nga dili makaabot pagpatambal sa mga pribado’ng ospital.

Apan ang serbisyo sa City Hospitalization Assistance Medicine Program (CHAMP) maisip nga dili g’yud epektibo kay maputol kini panahon sa kagabhion ug kaadlawon.

Kun may panginahanglan sa tambal niini’ng mga orasa, ang mga tagtungod sa pasyente kinahanglan pa nga magpaabot nga muabot ang mga kawani sa CHAMP ini’g ka alas utso sa buntag.

Sa dakbayan sa Davao, ang ilang opisina nga susama sa CHAMP, bukas 24 oras ug adunay opisyal nga gitugyanan aron mopirma sa mga dukomento sa tumong nga bisan gabii ug kaadlawon mahatagan gihapon og tambal ang mga pasyente nga nanginahanglan.

Kun sundon sa dakbayan sa Sugbo ang gihimo sa mga opisyal sa dakbayan sa Davao, sigurado nga daygon kini pag-ayo sa katawhan ug maisip na gayud nga tinuoray’ng pangalagad.

Kinahanglan usab nga ang mga kawani nga idistino sa susama niini nga opisina mao kadto’ng mapaubsanon ug mapahiyumon nga moabi-abi sa mga tawo, dili kadto’ng mga putong nga magsige lang og mugtok ang panagway.

Ang mga opisyal sa kagamhanan nagpapili sa ilang katungdanan aron sila makaserbisyo sa katawhan, dili kay aron magpadato sa ilang kaugalingon.