Pagsubay ni Ruby
Nahimo nang bagyo ang low pressure area (LPA) sa Pacific Ocean samtang padayong nagpaduol sa Pilipinas. Gikabalak-an nga mas mopaspas pa sa mosunod nga mga takna. Kay gipaabot nga mas mokusog pa ang hagiyos sa iyang hangin tungod sa kainit sa Pacific Ocean. Layo pa hinuon kaayo (dul-an sa 2,000 ka kilometro gikan sa silangang Mindanao) aron makaapektar sa bisan asang bahin sa nasud.
Gibanabana sa Philippine Atmospheric, Geophysical and Astronomical Services Administration (PAGASA) nga mosud ang bagyo sa Philippine Area of Responsibility (PAR) karong Biyernes, Disyembre 5. Bisan nianang higayona, di pa tang kabatyag sa iyang epekto. Mahimong magsugod paglaksot ang panahon sa Disyembre 6 o 7.
* * *
Nipasidaan ang PAGASA nga ang bagyong Ruby mosubay sa ruta sa bagyong Yolanda sa niaging tuig. Unsay ilang sukaranan? Kasagaran sa mga bagyo nga magsugod duol sa equator moigo gyud sa Kabisay-an ug Mindanao. Sa kaso ni Yolanda, way likuliko nga nipuntirya gyud sa silangang Kabisay-an, amihanang Sugbo ug kasadpang Kabisay-an.
Gawas sa Yolanda, ang bagyong Pablo niadtong Disyembre 3, 2012 nagsugod sab duol sa equator. Ang orihinal nga puntirya ni Pablo mao ang Sugbo ug Central Visayas. Apan nisimang dayong tugpa sa yuta ug didto morumbo sa Davao Oriental ug Compostela Valley ug sa habagatan ug tungatungang Mindanao.
* * *
Apan ato ning klarohon. Ang pagsubay ni Ruby sa ruta ni Yolanda wa magpasabot nga mao sab siya kakusog. Gibanabana sa mga eksperto ang kinakusgang hangin ni Yolanda nikapin sa 300 ka kilometro matag takna. May mga pangagpas nga si Ruby mahimong susama og gikusgon ni Pablo nga 270 ka kilometro matag takna.
Mahimo sab hinuon nga di na madugangan ang iyang gikusgon karon nga dul-an ra sa gatos ka kilometro matag takna. Mahimo gani nga mas mohuyang pa kun modasmag na sa habog nga kabukiran sa Mindanao. Busa di pa ta angay’ng motahan nga mga adlaw na lay iphon sa di pa ta maigo sa laing Pablo o Yolanda.
* * *
May makapadasig hinuon nga pangagpas ang langyaw’ng mga eksperto sa panahon. Lahi ang ilang nakit-an nga posibleng ruta sa umaabot nga bagyo. Ilang gipagawas nga mapa nagpakita nga si Ruby mosunod sa nangaging super typhoons sa wa pa si Queenie nga igo lang nilabay sa kadagatan, wa katugpa sa bisan asang yuta sa nasud.
Niangkon sang PAGASA nga ang direksiyon ni Ruby mag-agad sa gikusgon sa bira sa hangin sa ibabaw. Kun masuyop sa high pressure area, ang bag-ong bagyo di na maghasol sa Sugbo, Kabisay-an ug Mindanao. Kun dili adto na modiretso sa ngilit sa Luzon, sa amihanan-silangang bahin sa Pilipinas. Hinaot nga di una ta magkarakara. Kalma natong subayon ang lihok sa bagyo sa mosunod nga mga adlaw.
- Latest
