Binay kurog ni Roxas?

Sunod-sunod karon ang pagbisita ni Bise Presidente Jejomar Binay sa kamerkadohan lukop nasud. Nakighugoy-hugoy sa mga tawo ug nakigdungan sa pagpangaon kanila nga nagkinamot.

Kining tanan akong nasabtan nga pang-alkontra sa kalihokan ni DILG Secretary Mar Roxas nga naila kaniadto nga Mr. Palengke.

Gawas niini, pagpakita usab kini sa kabalaka ni Binay sa nagkaubos niya’ng popularidad ug nagkataas nga popularidad ni Mar Roxas nga posible niya’ng makaatbang sa eleksyon unya sa 2016.

Sa laktod nga pagkasulti, ang tanang kalihokan karon ni Binay pulos para sa iyang ambisyon nga mahimong presidente sa nasud pag-abot sa tuig 2016.

Sa kinatibuk-an, maingon ba nato nga nahadlok na ang bise presidente sa DILG secretary sa ilang panag-atbang pagbalik sa umaabot nga piniliay?

Nabasa na ba ni Binay ang taho sa iyang mga tawo nga naapektohan gayud ang iyang popularidad sa isyu sa kurapsyon nga gipasangil batok kaniya?

Si Binay misuway pagtago sa iyang tinuoray nga gibati sa mga isyu nga gibato batok kaniya apan dili ikalimod sa iyang dagway ang mga kabalaka nga ang mga isyu sa kurapsyon maoy makabaraw sa iyang ambisyon nga mahimong presidente.

 Kamo unsay tan-aw ninyo sa bise presidente? Motuo ba kamo nga kurog siya sa DILG secretary?

* * *

Tugoti nga akong pahalipayan ang among secretary sa Barangay Quiot nga si Langlang Tabada nga nagsaulog sa iyang adlaw nga natawhan karong adlawa. Happy Birthday Langlang. Hatagan ka unta og taas nga kinabuhi ug taas nga lawas, he he.