Guwapa nga piniriso

Gula 8

Gibalibaran ni Jenny ang tanyag ni Samuel nga adto lang moestar sa ilang balay mentras wala pa’y kaabtan. Giayo hinuon niya sa pagbalibad nga dili mahiubos ang iyang higala.

Naghinuktok si Samuel kun unsay sunod niya nga himuon kay hugot nga mibalibad si Jenny nga adto kini moestar sa ilang balay. “Adto lang usa ko sa balay sa akong amiga sa Duljo-Fatima,” matud ni Jenny.

“Apan ngano nga dili ka man gusto nga adto usa moestar sa among balay, total duna may kuwarto nga imong kaestahan?” matud ni Samuel. Gipasabot ni Jenny si Samuel nga bisan og nakaagi na siya og prisohan apan mauwaw siya nga mouban niini sa ilang balay.

“Ubani na lang usa ko sa balay sa akong amiga,” ingon sa namarayeg si Jenny kang Samuel. Walay nahimo si Samuel gawas sa pagsanong na lang sa awhag sa dalaga.

Misakay sila’g taksi paingon sa Duljo-Fatima duol sa gasoline station. Apan pag-abot nila didto, wala na nila makita ang balay kay gihimo na kini nga fast food restaurant.

“Sige kun dili ka moestar sa among balay, ipa-check-in na lang tika og lodging house,” giingnan niya si Jenny. Nag-atang sila og kasakyan. Taud-taud nga wala g’yuy miagi nga taksi sa ilang nahimutangan.

“Luoy nako nimo uy, miunong ka man g’yud nako. Sige, mosugot na lang ko nga adto usa mopahuway sa inyong balay. Asa ba dapit ang inyong balay Samuel?” ni Jenny nga gibati na og kalooy sa ulitawo.

Ingon sa naglumpayat sa kalipay ang dughan ni Samuel. “Salamat g’yud nga miuyon ka na nga adto lang sa balay usa moestar. Naa ra sa Mabolo ang among balay duol sa simbahan,” matud ni Samuel. (Sumpayan)