UC Jins nangharos sa tanang dibisyon sa PTL-Cebu

CEBU, Philippines - Nakuha sa University of Cebu (UC) jins ang liderato sa tanan dibisyon sa labing uwahing edisyon sa Philippine Taekwondo League (PTL)-Cebu nga didto gipahigayon sa SM Consolacion.

Ang UC-C  mikulit og “back-to-back” nga kadaugan sa senior men’s division human nila gipilde ang ilang igsuong koponan Team-A, 45-43 sa talagsaong “tag team” format.

Gumikan niini, ang UC-C nag-una sa liderato sa seniors division, samtang ang ilang Team-B nalandig sa ikaduha. Ang Team-A mikapyot sa ikatulo nga dapit.

Sa cadet division, ang UC mipatigbabaw  human moposte’g makabungog nga kadaugan batok sa  Southwestern University (SWU), 47-21. Sa kasamtangan, ang UC nagbitbit og 2-1 nga baraha, gisundan sa University of San Carlos (USC) ug SWU alang sa ikaduha ug ikatulo nga dapit.

Sa juniors division, ang UC mao sab ang nag-una uban sa USC ug SWU sa managsama nilang 2-0 nga baraha.

Ang UC Team-B misakmit sa solong liderato sa junior girls division sa ilang 4-0 win-loss record. Ang UC Team-A ug Team-C mipahiluna sa ikaduha ug ikatulo nga dapit.

Ang UC-A midaog sa UC-C, 46-26 sa ilang katapusang duwa.

Sa lain pang mga resulta sa juniors division, ang USC milansang og 52-37 nga kadaugan batok sa Cabancalan National High School (CNHS), samtang ang SWU mipukan sa CNHS.

Ang USC nagbitbit karon og 3-3 win-loss record, samtang ang CNHS nagpabiling walay daog  sud sa tulo nila ka duwa. (BANAT PALARO)