Ang gugma sa batan-on karon...!

Pagawpagaw ang tingog ni Mar sa radyo apan larino kaayong mulitok sa mga pulong labi na sa binisaya. Hawot sab pamation sa kahanginan daw bugnaw’ng hangin sa sayong kabuntagon.

Daghang nadani sa iyang tingog. Usa niini mao ang batan-ong estudyante sa Gullas College sa Toledo City nga si Lisa. Bag-ong dalaga si Lisa ug maanyag pa nga nalumay sa hawot nga tingog ni Mar...! Sa naandang pasiaw sa kahanginan sulod sa iyang programa nga Hugyaw sa Kaudtohon, mibagting ang telepono sa lamesa ni Mar atol sa Intermission.

“Hello, kinsa man ‘ni...?” Nangutana si Mar.

“Si Lisa kini..! Ania ako atubangan sa entablado sa imong programa..!” Tubag sa telepono kang Mar.

Miyahat pagtan-aw sa mga tawong nalingaw kaayo sa awit ug katawa sa programang Hugyaw, nakita ni Mar ang babayeng nagtapion sa iyang dunggan sa pikas telepono.

“Hi, Lisa, kumusta na...!” Pangumusta ni Mar samtang nagpadayon pa ang Intermission.

“Nakaila na ko nimo. Ikaw diay kadtong nangutana nako kun asa ang dalan padulong sa dakbayan sa Sugbo niadtong Sabado nga pista sa Toledo...!” sudya ni Lisa.

Wa dayon makatingog si Mar sa sudya ni Lisa. Mora’g nasud-ipan.

“Mao diay’ng wa magpaila kay gulang ka na ug pangit pa..!” Padayon ang panudya ni Lisa sa telepono nga kahilakon.

“Anugon lang nga nadani ako sa imong tingog. Sayang lang...!” Matud pa ni Lisa sa telepono.

Sa pagkatinuod, gibati ni Lisa ang wa hisabti nga pitik sa iyang dughan gumikan lang sa hawot nga tingog ni Mar sa kahanginan.

“Di na ko nimo..! Gulang ka na ug pangit pa... guwangit ka na, oyyy!”

Nagkanayon si Lisa kang Mar dayong bundak sa telepono. Daku ang kalainan sa panuigon ni Mar kang Lisa. Singkuwenta ka tuig ang pangidaron ni Mar samtang si Lisa, bayente pa ang iyang panuigon. Gawas pa niana, minyo na si Mar ug may unom ka anak. Si Lisa maanyag  ug si Mar pangit pa...!

Nakita ni Mar nga may batan-ong babaye nga mibiya sa pundok sa mga tumatan-aw sa programang Hugyaw ug sirit kining naglakaw paingon sa pultahan sa estasyon. Gisundan kini’g tan-aw ni Mar ang pagbiya ni Lisa hangtud nga mitabok sa dalan nga nagmud-ok ang dagway ug misakay sa taksi. Sa iyang bahin, nakatuaw si Mar: “Pastilan, kining gugma sa mga batan-on karon..!”

Ug mibalik siya sa iyang programa nga Hugyaw sa Kaudtohon. (Katapusan)