Aron masabtan pag-ayo

Kulba-hinam kaayo karong sunod semana kay si Mayor Michael Rama moduso na sa iyang Annual Executive Budget ngadto sa Cebu City Council.

Base sa balaud, ang mga mayor gihatagan og tagal nga ang ilang Annual Executive Budget para sa sunod tuig kinahanglang iduso nila ngadto sa tagsa-tagsa nila ka legislative bodies sa dili pa ang Oktubre 16.

Ang pangutana diha kun pila kaha ang isugyot nga budget ni Mayor Rama? Wala malilong nga ang mayor nagtinguha gayud nga dako ang iyang ikasugyot nga budget para sa sunod tuig.

Wala lagi problema bisan og himuon pa sa mayor nga P100 milyon ang budget sa dakbayan kay nagpasabot kini nga daghan kaayo nga proyekto ang mapatuman dinhi sa dakbayan.

Ang problema lang kun makolekta ba ang maong kantidad kun dak-on pag-ayo ni Mayor Rama ang isugyot nga budget? Sa unang tuig paglingkod ni Mayor Rama kaniadto’ng 2010, gusto niya nga P11.8 Bilyon ang budget.

Ang giaprobahan sa konseho kapin lang sa P6 Bilyon apan bisan pa og gipakubsan ang kantidad wala gihapon makaabot niini ang nakolekta sa mga tax collectors.

Sa sunod pa nga katuigan, dagko gihapon nga budget ang giduso ni Mayor Rama, apan mao gihapon, ang makolekta dul-an lang sa P5 Bilyones ug wala makaabot sa budget.

Nasabtan nako nga mao kini ang rason ngano nga kuti-kutihon gayud sa Committee on Budget and Finance nga gipangulohan ni Konsehal Margarita Osmeña ang isugyot nga budget sa mayor.

Tan-aw nako dili baya babagan lang g’yud ni Konsehal Osmeña ang isugyot nga budget sa mayor kun ang city treasurer makapasalig lang nga makolekta g’yud niya ang kinatibuk-ang kantidad.

Bisan kun gamay pa lagi ang aprobahan nga budget sa konseho unya daku ang kantidad nga nakolekta sa mga tax collectors, mahimo ra man nga moduso og supplemental budget ang mayor.

Sayop usab ang pagsabot sa uban’g tawo nga moingon nga walay daghang proyekto nga napatuman ang usa ka administrasyon kay gipagamyan ang budget.

Kun ingnon niana sa pagsulti mora’g maisip nga duna na g’yuy kuwarta unya dili lang ipagasto sa committee on budget and finance. Dili kana maoy tinuod.

Gibana-bana lang sa konseho ang kantidad sa budget nga aprobahan kay kun dakuon pag-ayo, aw puwerte’ng daghana nga proyekto nga dili mapatuman kay dili man masuportahan og kuwarta.

Pananglit P11 Bilyones nga budget nga nagsuporta sa mga proyekto apan ang nakolekta mga P5 Bilyones lang, nagpasabot nga P6 Bilyones nga proyekto ang dili mapatuman. Nasabtan ba ninyo?