Angel ganahan mag-agriculturist

CEBU, Philippines - Gibutyag ni Luis Manzano nga nitungha  karon og Agriculture ang girlfriend niya nga si  Angel Locsin . Plano usab sa iyang uyab nga makabaton og kaugalingong organic farm.

Dili komportable sa titulo

Kung si Dennis Trillo ang pasultion, dili niya feel ang titulo nga "Ulam" nga usa sa mga episodes sa pelikulang Shake, Rattle & Roll 15. Nalakip si Dennis sa maong pelikula ug gidasig niya ang iyang fans nga hangyoon ang Regal Films nga ilisan ang maong titulo.

Vic mitingog na gyud

Gipadayag ni Vic Sotto nga wala'y angayan nga dalian ug maabot ra ang saktong panahon nga pabuhatan niya og balay si Pauleen Luna. Gihimakak ni Vic ang wala mahupas nga tsika nga matud pa nga hagbay ra niya nga gipalitan og balay ang iyang girlfriend.  "Darating tayo diyan," suma pa ni Vic.

Bitbit sa boyfriend

Giubanan gyud si Ai-Ai delas Alas sa iyang 20 anyos nga boyfriend nga si Gerald Sibayan sa pagtikang niya sa Abu Dhabi niadtong Huwebes aron motambong og usa ka importanteng kalihukan. Todo post ang duha sa Instagram sa ilang mga hulagway samtang naa sila sa airport. 

Deretso sa charity

Giangkon ni Direk Michael Tuviera nga dili isyu ang talent fee nila ni Richard Gomez ug Dennis Trillo sa pelikulang Janitor gumikan kay gideretso kini sa charity.  Una na nga gipadayag ni Dennis nga naandan na gyud niya nga mopaambit sa mga grasya nga iyang nadawat.

Roxanne napildi sa kaso

Gibasura sa Pasig Prosecutor's Office ang rape complaint nga gipasaka ni Roxanne Cabañero batok kang  Vhong Navarro.  Si Fiscal Christine Perolino maoy mipagawas sa resolusyon .

Alden mihimakak

Nakugang si Alden Richards sa nitumaw nga hungihong nga usa siya sa mga rason kung nganong ganahan si Aljur Abrenica mohawa sa  GMA -7. Suma pa ni Alden nga imposible ra kaayo ang maong istorya.

Ganahan makaanak

Gusto ni Mommy Dionisia Pacquaio nga makabaton sila og anak sa iyang boyfriend nga si Michael  Yamson. Apan gisalikway ni  Michael ang maong ideya.

Tambag sa Songbird

Gitambagan ni Regine Velasquez sila si Marian Rivera ug Dingdong Dantes nga kinahanglan nga sundon ang formula nga "best of friends" inigkahuman sa ilang kasal. Suma pa ni Regine nga mao kini ang rason kung nganong nagpabilin nga lig-on ang kaminyuon nila ni Ogie Alcasid.

Nalingaw sa pagka-single

Mibuhakhak pag-ayo si Shaina Magdayao sa dihang gipangutana kung duna na siya'y lovelife. Una na nga gipadayag ni Shaina nga blanko pa ang iyang kasing-kasing.

Napul-an og badlong

Gikatahong napul-an na ang Mommy Divine ni Sarah Geronimo sa pagsige og badlong sa iyang anak. Kahinumduman nga dili ganahan si Mommy Divine kung sweet atubangan sa daghang tawo sila si Sarah ug ang uyab niini nga si Matteo Guidecilli.

Dumot gihapon

Nagkasugat na pud sila si Nikki Gil ug Billy Crawford sa lobby sa ABS-CBN sa miaging adlaw. Giingong nisuway og pahiyom si Billy ngadto kang Nikki apan gidedma lang kini.

Humot sa kababaenhan

Malipayon si Dennis Trillo gumikan kay wala pa gyud nahupas ang karisma niya sa pagrampa og mga fashion show. Giingong daghan na kaayo ang nisulbong nga mga artista apan wala gihapon siya masapawi sa limelight. 

I Do gihangop

Nagmaya si Judy Ann Santos gumikan kay puros mga positibong feedback ang nadawat sa reality show niya sa ABS-CBN nga I Do. Suma pa ni Juday nga bag-o ang estilo sa maong show busa wala siya magdahom nga hangpon dayon kini sa viewers.

Miss  Intercontinental  2014  iuswag

 Iuswag sa laing petsa ang gikatakda nga coronation night sa Miss Intercontinental 2014 nga ipahigayon unta didto sa Jordan karong buwana.

Ang chief executive sa Jordan Project of Tourism Development (JPTD) nga si Mahmoud M. Zuaiter nagkanayon nga nakab-ot ang maong hukom gumikan sa isyu sa seguridad sa maong dapit.

Gitataw hinuon sa maong opisyal nga paningkamotan gyud nila nga madayon kini sa laing lugar ug petsa  nga sabotan pa sa World Beauty Organization(WBO), JPTD ug sa mga opisyales sa maong dapit.

Nasayran nga nalakip ang Jordan uban sa  Saudi Arabia, United Arab Emirates, ug  Qatar, sa international coalition nga kaalyado sa Amerika sa pagpakgang sa mga kalihukan sa  Islamic State of Iraq and Syria (ISIS) militants. Pambato sa Pilipinas sa Miss Intercontinental 2014 ang 24-anyos nga Sugbuanon  nga si  Kris Tiffany Janson.

 Kahinumduman nga sa miaging tuig, napili nga third runner-up sa maong indigay  ang pambato a Pilipinas nga si Koreen Medina nga gipahigayon didto sa Germany.

Miss Universe ipahigayon sa Miami

Pormal na nga gianunsyo sa presidente sa  Miss Universe Organization nga ipahigayon didto  sa  Miami ,  Florida ang  Miss Universe 2015 pageant.

Ipahigayon ang coronation night sa Florida International University karong Enero 25, 2015

Si Mary Jean Lastimosa maoy  kandidata sa Pilipinas sa nahisgutang indigay. Gipasalig sa mga opisyales sa maong dapit nga wala'y kuwarta sa katawhan o buhis ang magamit sa maong indigay.

Nasayran nga ang Venezuela maoy labing daghan nga naangkon nga korona sa Miss Universe.

Dako usab kini nga hagit para sa pambato sa Pilipinas gumikan kay kanunay nga nasulod sa top 5 ang mga representante sa nasud alang niining labing prestihiyoso nga indigay sa kaanyag sukad niadtong 2010.

Kahinumduman nga na-4th runner-up si Venus Raj sa Miss Universe 2010 , third runner -up si Shamcey Supsup niadtong 2011,first runner-up si  Janine Tugonon niadtong 2012,   third runner-up si Ariella Arida niadtong 2013.   (Sanden J. Anadia)

Tia Pusit mipanaw na

Mipanaw na  ang komedyanteng aktres nga si Tia Pusit  sa alas 11:30 sa gabii niadtong Huwebes human sa pipila ka buwan nga pag-istar sa tambalanan.

Si Tia Pusit o Myrna Villanueva sa tinuod nga kinabuhi taud-taud na nga gipaubos sa double bypass surgery sa Philippine Heart Center sa Quezon City.

Ang 66 anyos nga aktres adunay upat ka mga anak. Matud pa sa iyang igsuon nga si Nova Villa nga nagsagubang si Tia Pusit og grabeng komplikasyon  sa iyang lawas nga miresulta na ngadto sa brain hemorrhage.

Gioperahan kini niadtong September 9 ug naghambin usab siya sa sakit sa kidney ug aneurysm.

Ang higala ni Tia Pusit nga si Inday Garutay nipadayag nga ipadayon gihapon niya ang nakatakda na nga concert for a cause ugma sa  Zirkoh comedy bar.

Nailhan si Tia Pusit gumikan sa talento niya sa natad sa komedya sulod na sa tulo ka dekada.

Katapusang nalantawan ang komedyanteng aktres sa seryeng "Ikaw Lamang" isip  assistant ni Kim Chiu.