AFP modawat og bag-ong reservists
CEBU, Philippines - Andam na nga modawat sa mga bag-ong batch sa reservist ang Armed Forces of the Philippines Reserve Command (AFPRESCOM).
Si Lieutenant Colonel Jeffrey Saballo, commanding officer, AFPRESCOM Center, Central Command, miingon nga andam nilang dawaton ang mga tawo nga gustong moalagad sa nasud isip reservist.
Ang AFPRESCOM modawat sa mga doctor, dentist, veterinarian, nurse, abogado, pari, ministro, pastor, imam ug mga gradwado sa Education nga may master’s degree.
Dawaton usab isip reservist ang mga nakagradwar sa kurso’ng Physical Therapy, Physical Radiology, Physiology, Social Sciences, Sanitary Engineering, Opthalmology, Biological Science, Journalism, Radiological Technology, Commerce major in Economics, Accounting, Humanities Management, Pharmacy, Medical Technology, Mechanical Engineering ug Mass Communication.
Kinahanglan nga moduso ang aplikante og Personal History Statement, Transcript of Records o College diploma, PRC Certificate o Civil Service Eligibility, ug mga clearances sa barangay, police, mayor, Regional Trial Court ug sa NBI.
Matud ni Saballo nga sa higayun nga madawat na sila labing menos nga ranggo sa mga reservist mao ang 2ndLieutenant ug labing taas nga ranggo nila ang Lieutenant Colonel.
Matud niya nga ang Republic Act 7077 o ang AFP Reservist Act of 1991 mao ang gipasikaran nila nga balaud sa maong recruitment sa reservist.
Ang mga reservist mao ang unang ipatawag sa armadong kusog sa higayun nga may gubat.
Apan kung wala’y gubat ang buhat sa mga reservist naglangkub sa pagtabang sa mga socio-economic developments ug sa pagbantay sa seguridad sa nasud. (BANAT NEWS)
- Latest
