Proyekto sa DPWH karon ug kaniadto

Angay nga mopagakpak ang katawhang Sugbuanon sa gipatumang proyekto sa Department of Public Works and Highways (DPWH) 7 nga padayon nga pagpalambo  sa mga kanal  ug pagsemento sa kadalanan.

Ang pagpalambo sa mga kanal pinaagi sa pagpalawom ug paghulip sa gagmay nga imbornal  tataw nga mao kini ang nakitang paagi sa mga engineer sa DPWH nga pagsulbad sa suliran sa mga pagbaha.

Ug ang  pagsemento sa kadalanan  tataw usab nga gitumong alang sa maayong pag-agi kay  ang mga sakyanan dili na man magkindangdang sa ilang pagdagan sa mga libaong.

Hinuon daghan usab ang nag-ingon nga dili pa gayud masiguro nga ang gihimo sa DPWH  pagpalambo sa kanal makasulbad sa pagbaha ug dili usab masiguro kun hangtod kanus-a maayo ang dalan kay posible man gihapon kining maguba.

Samtang angay nga pagakpakan ang DPWH 7  sa gipatuman nga mga proyekto dili usab ikalimod nga daghan ang nagbagulbol  kay namatikdan man ang kahinay sa pagtrabaho sama nga hinay usab ang pagbiyahe kay nasinati man ang grabeng suliran sa trapiko.

Nunot sa ilang pagbagulbol  maoy ilang ipatabyog ang pangutana kun kanus-a mahuman ang kaugmaran  kay wala  may giplastada nga billdboard o karatula nga nagpahibalo sa gipatuman nga proyekto.

Matud pa nila nga dako kaayo og kalainan ang ipatuman karon nga proyekto sa DPWH kay  ang   kaniadto may  billboard man o  karatula nga ilang iplastada sa pagpahibalo sa  katawhan  sa pangalan sa kontraktor nga nagtrabaho, kantidad sa proyekto nga gitrabaho,  kanus-a  gisugdan ug kanus-a usab mahuman.