Chocolate

Gula 2

Gawas nga walay kuwarta nga ikabayad ang dalaga sa napulo ka pilo-pilo nga kantidad sa chocolate nga iyang gikuha nga wala bayari, mihilak pag-ayo ang dalaga kay mahadlok siya nga mahibaw-an sa iyang mga kaila ang iyang gihimo.

Apan gipasabot si Charisse ni Arante, ang head sa mga private detective  sa department store, nga wala g’yud sila’y mahimo gawas sa pagdala kaniya sa Waterfront Police Station kay nagtuman ra sila sa ilang trabaho.

“Mahimo nga bayaran nimo ang kantidad sa gikuha nimo nga chocolate. Kon dili nimo bayaran unya dili ka namo dad-on sa police station, kami ‘sab ang mawad-an sa trabaho day,” matud ni Arante.

Nasayran ni Larry nga P215 ang kantidad sa chocolate. Kon ang kantidad piloon og ka-napulo, mahimo na nga P2,150 ang bayranan ni Charisse. Mibakho pag-ayo ang dalaga samtang nag-akbo sa lamesa.

“Wala na ba g’yuy laing paagi nga mabuhian siya bai Arante?” gisukna ni Larry ang higala nga pangulo sa mga detective sa tindahan. “Wala na g’yud bai, mapugos g’yud mi pagdala niya sa police station.”

May gihuna-huna si Larry. Naluoy kaayo siya sa babaye. Ang iyang katahom dili angay nga kamansahan pinaagi sa pagsulod sa prisohan tungod lang sa gamay kaayo nga kantidad.

Gikuot ni Larry ang iyang pitaka og gikuha ang tulo ka tibuok tag-usa ka libo ka pesos. “Bai Arante, ipalihog lang og pabayad ni sa imong sakop didto ug ihatag nako ang resibo aron dili tawon mapriso kini si Charisse,” ni Larry pa ngadto sa iyang higala.

Dali nga miyangad si Charisse ug mitan-aw kang Larry nga luhaan pa gihapon ang mga mata. Wala tuyoa nga tungod sa kalipay nagakos ni Charisse si Larry. “Salamat kaayo sir, salamat kaayo sa imong pagtabang nako,” matud ni Charisse nga padayong naghilak. (Sumpayan)