Moru-moruhan sa nawong

Dear Tita Salie,

Have a good day. Gusto ko mangayo’g advice bahin sa akong sitwasyon karon.

Nag-eskuyla ko karon sa college for free kay scholar man ko. Unya nia ko nagpuyo sa balay sa akong magulang nga lalaki. Minyo na kining akong magulang, dunay mga anak. Wala’y trabaho ang iyang asawa ug kanunay lang anaa sa balay kay magbantay sa ilang mga anak.

Ang problema nako, Tita Salie, kay magsige man og moru-moru ang nawong sa asawa sa akong magulang ug usahay magyawyaw siya nako ug mamuyboy pa. Dili nako kalikayan nga sakitan ko. Busa nananghid ko sa akong magulang nga mobalhin ko og kapuy-an. Apan dili mosugot kay gasto na kaayo.

Unsa may akong buhaton? Palihog pasabta ko, Tita Salie. Thank you very much and more power.

* * *

Hello! Nindot nga batasan ang pagka-alive ug alegrehon alang sa mga buluhaton sa panimalay. Mao kini ang maayong taras nga atong gamiton labina kon kita nangipon lang pagpuyo aron dili kita boyboyon sa tag-iya sa balay nga atong gipuy-an.

Inig-uli nimo gikan sa school dapat alive, imong i-greet ang asawa sa imong magulang o kaha imong lingawon ang iyang anak aron makabuhat siya sa iyang buluhaton. Imong estoryahon ang imong ate kon unsay imong ikatabang kaniya ug dapat smiling ka nga moatubang kanila. Ikaw ang mohimo sa nindot ninyo nga relasyon pinaagi sa imong pagkamaabi-abihon. Talk to her gyud permi aron ganahan siya nimo. Makisusi ka sa ilang kaagi, o sa ilang lovelife sa imong kuya kon giunsa nila pagkaila.

Ingon lang niini ang buhata og I’m sure magkasuod gyud mo pag-ayo. Ayaw tugbangi ang iyang moru-moru og lain nga moru-moru aron malipayon mo. - Tita Salie