Di kakita pero mokita

Diha kadto’y episode sa TV nga atong nasundan, nga naghulagway sa mga tawong may mga kakulian sa panglawas. Sama sa usa ka bayongbayong nga lalake nga sayong nailo. Siya’y naninguha nga mabuhi, uban ang iyang duha ka manghod. Bisan sa iyang kahimtang nga wala’y mga tiil, nga batiis na lang mora’g kawayang giugsok sa yuta kon maglakaw. Kapait gyud sud-ongon sa trabaho niya nga maglukdo’g sinako sa graba, nga ang dalan pulos kabatuan. Matud sa bata, grabe ang pagsakripisyo niya pero kinahanglang mabuhi sila.

Apan didto ko naika’g og maayo sa lain nang episode, mahitungod sa edaran nga 75 aynos na. Normal ang panglawas apan di kakita kay way mga mata o kalimutaw. Nga padayon pa sa iyang naandan nga trabaho. Hanas kaayong mokatkat sa mga punoan sa lubi, nga manguha’g butong ug lahing.

Makapakitbi sa atay ang kahaniti niya sa pagtigbas sa butong samtang nagkupot ang laing kamot. Sus kon mosipyat, putol gyud ang kamot bisa’g may mata pa kay maligas unya. Labaw pang delikado ang iyang kangilngig, kanang kalit lang iugsok ang lahing lubi sa usa katalinis kaayong puthaw, aron kuhaan kini sa bunot. Aw seguradong matuhog ang kamot pero maayo gayud mokalkulo sa iyang mga lihok, nga molabaw pa sa adunay mga mata. Nga giyano lang pagsuot-suot ang  kakahuyan, nga malisud unta alang kanila.

Dinhi makita nato kon unsa sila kapursigido sa kinabuhi. Padayon sila sa pakigbisog bisan luyo sa kakulian sa panglawas, sama sa mga way tiil ug way mga mata. Mokita gihapon sila nga malipayon sa ilang panginabuhi.