Kanhi Justice Secretary Gonzalez namatay

CEBU, Philippines – Kanhi Iloilo City lone district representative ug Justice Secretary Raul Gonzalez, Sr. namatay niadtong Domingo, Septiyembre 7 sumala pa sa pamilya niini.

Ang 83-anyos nga si Gonzalez namatay alas 10:30 sa gabii sa  National Kidney Institute (NKI) sa Quezon City.

Ang banay’ng Gonzalez miluwat og pamahayag nga namatay ang maong kanhi opisyal tungod sa “multiple organ failure.” Ug midugang usab nga malinawon nga mitaliwan si Gonzalez nga gialirongan sa iyang kapikas nga si, Dr.

Pacita Trinidad Gonzalez ug lima nila ka mga anak human sa ilang pag-ampo og Holy Rosary nga giingong paboritong pag-ampo sa kanhi Justice Secretary.

Gihulagway siya sa iyang pamilya nga usa ka responsableng bana, amahan ug manggihatagong apohan, matinud-anong higala ug walay kahadlok nga public servant.

Giingong dugay nang nag-antos si Gonzalez sa sakit sa kidney ug nipaubos na usab og kidney transplant niadtong 2007 dihang midonar ang iyang drayber nga si Felicito Gunay sa usa niya ka kidney.

Si Gonzales nahimong legal assistant sa gobernador sa Iloilo niadtong 1960 ,  nahimo usab siyang Senior Legal Assistant to the Mayor  sa Manila, natudlong Executive Member sa Board of Censors for Motion Pictures ubos sa  Office of the President gikan 1963 hangtud 1969 ug uban pa.

Atol sa Martial Law, misang-at siya og daghang petisyon sa Korte Suprema batok sa rehimeng Marcos ug natudlong Tanodbayan (Ombudsman) niadtong 1986 hangtud 1988 sa panahon ni kanhi presidente Corazon Aquino.

Tuig 1995 dihang natudlo siyang kongresista sa lone district sa Iloilo City nga iyang gihuptan hangtud  sa tuig  2004.

Kabahin usab siya sa prosecution panel atol sa impeachment trial batok sa gipalagpot nga si kangi Presidente Joseph Estrada. Siya maoy Chief Justice  sa panahon ni kanhi president ug karon Pampanga representative Gloria  Macapagal-Arroyo gikan 2004 hangtud 2009. (Gikan sa The Freeman/EIM) (BANAT NEWS)