Laraw sa pagpabadlong

Alas sayis sa buntag. Niabot na si Sergio sa finish line sa iyang lakwanan. Kilometrahe numero 44 sa Puente, Carmen, Cebu. Igo lang siyang nihikap sa ulo sa monumento. Ug nibalik sa agi ngadto sa kilometrahe 41 sa barangay Cogon diin tua iyang balay. Sa pagbiya niya sa monumento human niya nahikap, may nakita siyang lunhaw nga XUV nag-parking daplin sa karsada.

Tinted ang mga bintana. Ug nag-andar ang sakyanan nga nag-atubang sa kilometrahe 44. Dapit sa too sa sakyanan, may gate sa usa ka dakong balay. Nagkang-al ang maong gate bali’g usa ka dangaw.

Nakuryoso si Sergio. Giduol ug gilili niya ang bintana sa sakyanan dapit sa drayber. Way tawo sa sulod. Natental siyang mopabadlong sa sakyanan. Sakyan niya. Unya iyang drayban. Kay gusto siyang magpraktis og maneho. Di pa man siya haniti modrayeb. Gigunitan na niya ang handle sa pultahan dapit sa drayber aron ablihan.

Nabatasan na ni Sergio nga mag-hike kada buntag. Kay naglikay sa mga sakitsakit. Kay  naglikay nga maliwat sa iyang ginikanan. Sayong nangamatay iyang papa ug mama sa komplikasyon sa dayabitis. Unya, isip kinamaguwangang anak, siya ang nahimong amaha’g inahan sa iyang lima ka manghod.

Kugihan si Sergio. Mahilig magkurikuri. Daghang nakat-onan. Kamao siya mamanday, managat, mag-uma ug mananggot. Apan tapulan siya moeskuyla. Pagtunob niya’g grade five, wa na siya nihuman. Bisa’g giunsa’g pugos sa iyang mga ginikanan, paryente, igsoon, higala ug mga silingan.

Dihang nagtungha na sa hayskul iya tanang manghod, nanimpalad siya’g panarbaho sa siyudad. Nakatrabaho siya’g gasoline station. Unya nakat-on og drayeb. Nidrayeb dayon siya’g taksi. Pagkasaghid niya, gitaktak dayon siya’s tag-iya sa taksi. Maong nipauli siya. Nibalik siya’g panagat, panguma ug pananggot. Mamanday sab siya kun dunay mosuhol. Gitambagan niya iyang mga manghod nga kun makahuma’g hayskul, manarbaho na lang. Kun makalugar og eskuyla sa kolehiyo, mag-self-supporting student na lang. Kay siya na lang ang magpabilin sa probinsiya.

Birahon na unta ni Sergio ang pultahan sa sakyanan aron ablihan. Unya, bang! bang! bang! May mga buto sa pistola gikan sa sulod sa gate. May mga tunob nagdinaganay sulod sa gate. Nidagan sab si Sergio padulong sa ila. Nasugatan niya ang patrol car sa pulis nga nag-siren.

Pagkaugma, nabasa na lang ni Sergio sa mantalaan. Gitulis ang dakong balay. Apan patay ang tulo ka tulisan. Buhi ang ikaupat. Pero nadakpan. Hilom nga nagpasalamat si Sergio nga nasanta pa gyud iyang nahunahunaang pagpabadlong. Kay kun wa pa, basi’g patay sab siya. O kaha, nasikop og apil. (Katapusan)