EDITORYAL – Kampanya batok sa mga ligoy

Wala malilong sa katawhan nga naglisod karon ang kagamhanan sa dakbayan sa Sugbo tungod kay kuwang ang koleksyon niini nga buhis kun itandi sa mga bayranan ug sa ubang gastohanan.

Daghan ang nakapangutana kun ngano nga wala man putla sa mga opisyal ang gastohan sa mga walay hinungdan nga kawani. Daghang mga kawani sa dakbayan nga makit-an usahay nga magpalandong lang ilawom sa kahoy atubangan sa City Hall.

Ang ubang kawani sa City Hall walay adto-adto sa ilang mga opisina apan sige ang sweldo. Dunay mga consultants nga lisod usab makontak kay bisan gani ang opisina ni Mayor Michael Rama nga maoy nagkuha kaniya wala masayod asa kontakon ang maong tawo.

Ang tagdumala og mga ahensya sa kagamhanan ug mga Local Government Units (LGU’s) dili kay mohimo lang og kampanya batok sa graft and corruption, kondili kinahanglan nga mohimo usab sila og kampanya aron tangtangon ang mga kawani nga nag-usik-usik lang sa kwarta sa kagamhanan.

Daghan ang nagtuo nga sa City Hall maglisud paghimo niini si Mayor Rama kay ang uban sa mga tawo nga nagdawat og sweldo bisan og walay klaro nga trabaho iyang mga suod ug nakatabang kaayo kaniya panahon sa eleksyon.

Apan alang kang Mayor Rama nga kanunay moangkon nga sinsero siya pagtul-id sa hiwi nga binuhatan, angay unta niya nga pamatud-an ang iyang baruganan bisan pa man og adunay masakitan sa iyang mga dumadapig.