Swat team sa naga gilusad
CEBU, Philippines - Pormal na nga gilusad ang Special Weapon and Tactics (SWAT) sa dakbayan sa Naga nga gitambongan sa dagkung opisyal sa kapolisan ug mga mayor sa ubang siyudad ug kalungsuran.
Ang kalihukan gipahigayun sa Enan Chiong Activity Center (ECAC) kagahapon diin gipakita sa 20 ka sakop sa SWAT ang pagluwas sa biktima ug pagsikop sa suspetsado sa usa ka hostage drama.
Sa gipahigayong press conference, si Naga City Mayor Valdemar Chiong mibutyag nga ang siyudad migahin og P1.5 milyones nga pondo sa training sa SWAT.
Matud ni Chiong nga buot niyang andam na ang Naga kung dunay mga dagkung insidente nga mahitabo nga magkinahanglan og mga eksperto ang pagtubag sama sa SWAT Team.
Ang SWAT sa Naga mahimong mapadala sa laing mga lungsod ug siyudad kung gikinahanglan.
Gawas niini gibutyag sa mayor nga ang siyudad niining tuiga gikatakdang magpatukod og bag-ong building isip Police Station diin migahin na ang siyudad og P10 milyones. Anaa sa maong building ang buhatan sa SWAT.
Si Senior Supt. Noel Gillamac, hepe sa Cebu Provincial Police Office, miingon nga istrikto ang ilang pagpili sa mga sakop sa SWAT diin ila gyud kining gihashasan.
Matud ni Gillamac nga ang mga sakop sa SWAT “physically†ug “mentally fit†diin nakapasar sila sa mental ug physical examination.
Gibutyag ni Gillamac nga sulod niining buwana ug sa unang semana sa buwan sa Hulyo, ang mga dakbayan sa Bogo, Danao ug Talisay pormal usab nga molusad sa ilang mga SWAT Team.
Matud ni Gillamac, ang pagbaton og SWAT sa usa ka lungsod o siyudad makahatag kini og kompiyansa sa mga negosyante kabahin sa ilang seguridad.
Subay niini, si Senior Supt. Condrado Capa, deputy director for operations sa Police Regional Office-7 nagkanayon nga ang SWAT dili lang kini magpundo sa ilang buhatan.
Iyang gimanduan ang SWAT Team nga mobisita sa mga lugar sama sa mga bangko, business establishments ug mga eskwelahan aron ang katawhan makabaton og kompiyansa ug ang mga badlongon magpanagana og buhat og krimen kung dunay makita nga SWAT. - /GMR (BANAT NEWS)
- Latest
