EDITORYAL - Storm surge ug baha sa teleserye

Aduna’y sugyot ang National Disaster Risk Reduction and Management Council o NDRRMC nga gamiton ang mga teleserye ug mga artista  sa information campaign kabahin sa storm surge, baha ug uban pa nga mga katalagman. Epektibo kaha kini?                           

Posible. Ang mga Pinoy, hilig kaayo manan-aw og mga drama sa telebisyon o mga teleserye. Gani, aduna’y uban nga magdali-dali og pamauli sa ilang balay aron lang gayud makatan-aw sa ilang mga paboritong programa sa telebisyon. Sa dihang nanggawas ang mga cellphone nga aduna’y TV, daghan usab ang namalit ani kay makatan-aw na man sila sa ilang paboritong teleserye bisan asa.

Ang pagkamahiligon sa Pinoy sa mga teleserye maoy hinungdan nga misikat ang mga langyaw nga artista dinhi. Nakahinumdum pa ba kamo nila ni Thalia sa Marimar, ang F4 sa Meteor Garden ug uban pa?

Dili usab magpapilde ang mga lokal nga artista sa mga teleserye. Daghan kaayo ang  nangabuang sa mga local shows sama sa My Husband’s Lover ug sa The Legal Wife. Kung padayonon gayud sa NDRRMC kining maong sugyot, dako kaayo ang tsansa nga malampuson ang maong information drive tungod kay ang mga Pinoy, hilig kaayo magsunod-sunod sa ilang mga idol nga artista.

Imbes nga kabahin sa mga kabit, forbidden love ug uban pa, mas maayo pa nga gamiton ang mga teleserye pagpahibalo sa katawhan kabahin sa pagpangandam batok sa mga katalagman.