Lola kaduha gidam-agan Og sakyanan

CEBU, Philippines - Usa ka 71-anyos nga lola namatay human madam-agi og sakyanan nga ang drayber mipaturatoy ra sa pagpadagan didto sa Barangay Poblacion, Pardo, dakbayan sa Sugbo kagahapon sayo sa buntag.

Human si Teresita Montebon nadumbolan sa usa ka sakyanan, nabanggaan pa g’yud siya pag-usab sa nagsunod nga Corominas bus nga gimaneho ni William Apora, 33, taga Carcar.

Si Montebon nga taga dalan F. Jaca, Barangay Inayawan, gikan sa simbahan ug motabok na unta sa karsada alas singko sa kaadlawon diha nga gidam-agan sa kusog nga nagdagan nga sakyanan.

Mitahan hinuon dayon sa kapolisan si Apora human nga madam-agan niya ang tiguwang. Gitanggong si Apora sa Traffic Division sa kapolisan sa dakbayan sa Sugbo.

Usa ka concerned citizen ang mitawag sa Banat News kagahapon ug mipahibalo nga wala tagda sa polis sa Pardo ang iyang pagpahibalo kanila nga ang unang sakyanan nga nakadasmag sa biktima naa ra sa unahan mihunong.

Ang Poblacion, Pardo adunay skywalk nga gitukod apan ang mga tawo dili mogamit ug modiretso lang sa paglabang sa karsada. Kagahapon sa kaadlawon, aduna ‘say nagbisekleta nga nabiktima usab sa hit and run. Si Diosdado Paras nagsubay sa karsada sa Sitio Banawa dihang gibanggaan siya og sakyanan ug gibiyaan.

Ang biktima nga nakaangkon og mga pangos wala na makatimaan sa plate number sa sakyanan tungod sa kakalit sa hitabo. (/RUB)(BANAT NEWS)