Angel wala mabalaka

CEBU, Philippines - Tsika pa ni Angel Locsin nga dako kaayo siya og salig ngadto sa iyang boyfriend nga si Luis Manzano busa wala siya mabalaka sa posibilidad nga mailog kini og lain sama sa sitwasyon niya sa seryeng The Legal Wife. Matud pa sa aktres nga nagkalig-on og samot ang relasyon nila sa TV host.

Alang sa mga anak

  Gibutyag sa kanhi sexy star nga si Patricia Javier nga usa sa rason nga nibalik siya sa showbiz mao nga makaistar siya og dugay dinhi sa nasud ug sa maong pamaagi, makat-on ang iyang duha ka mga anak og tinagalog.

Andrea mihilak

Nakahilak atol sa iyang adlaw’ng natawhan ang kapuso aktres Andrea Torres diin gisaulog niya kini uban sa mga batang nagkinahanglan og  espesyal nga pagtagad didto sa New Hope SPED Center. Atol sa iyang pagbisita sa maong center, gikantahan usab siya sa usa ka batang babaye og birthday song butang nga nakapatandog niya og samot.

Big twist

Gibutyag sa kapuso actor nga si Raymond Bagatsing nga usa sa nakahugyaw sa seryeng Carmela mao nga tulin ang dagan sa istorya niini ug angayan atngan ang ending sa maong serye gumikan kay duna kini twist.

Wyn nakapuntos ni Gladys

Misaludo si Gladys Reyes ngadto sa co-star niya sa Kambal Sirena nga si Wyn Marquez gumikan kay maayo kini modala isip kontrabida sa kinabuhi nila ni Louise delos Reyes ug Aljur Abrenica sa maong pantaserye. Napanglantawan ni Gladys nga layo og maabtan ang career ni Wyn.

Unang indie film

Gibutyag sa beteranang aktres nga si Nova Villa nga karon pa lang siya kasuway nga malakip sa usa ka indie film. Nalakip ang aktres sa indie film nga "1st ko si 3rd" nga entry sa Cinemalaya Philippine Independent Film Festival alang sa New Breed Category.

Sekreto para bibo

Nagdumili pagbutyag ang Kapuso Primetime Queen nga si Marian Rivera kung unsa nga butang ang taud-taud na niya nga gitipigan nga matud pa dunay  sentimental value. Giingong manggihatagon nga aktres si Marian sa uban niya nga mga gamit, apan ang nahisgutang butang ra gyud ang dili niya puwede nga ihatag. (Ian Gonzaga Basiliote CNU Comm. Intern.)

Child Star of the Year

Malipayong nidawat sa iyang pasidungog isip Child Star of the Year ang Kapuso child actress nga si Ryzza Mae Dizon atol sa 1st PEP List Award niadtong Martes. Daghang nalingaw sa awards night sa dihang gidawat ni Ryzza ang maong pasidungog. "Hindi ko kaya (ang trophy), ang bigat!," komedya  pa niini.

Anugon

Giangkon sa Queen of Pinoy Soap Opera nga si Judy Ann Santos nga gianugonan siya sa wala niya pagdayon sa "Mariquina" nga New Breed category finalist sa Cinemalaya Philippine Independent Film Festival 2014. Matud pa niya nga dili na gyud madala sa iyang schedule.

Rated SPG

Sa unang higayon sukad nga gipagawas sa telebisyon ang PBB All In, giingong Rated SPG ang programa niadtong Martes sa dihang gipakita nga nagduwa ang mga housemates og "truth-or-dare." Nahitabo ang maong duwa sa dihang gihatagan ni Kuya og pool party ang tanang housemates gawas sa lima niini nga dili pwedeng moinom og alcohol.

Gikagubtan na pud

Gipistahan sa Twitter worldwide ang teleseryeng The Legal Wife niadtong Martes sa gabii kung diin gipakita ang eksena nga gibatbat na ni Angel Locsin (Monica) ngadto kang Maja Salvador (Nichole) ang linya nga , "Akin lang ang asawa ko!"

Niño nagkaduol na

Mosikad na karong Mayo 26 ang pagpasalida sa seryeng Niño sa GMA-7 kung diin usa si Miguel Tanfelix sa bida niini. Todo pangandam ang gibuhat ni Miguel alang sa maong serye ilabi na modala siya sa karakter sa bata nga dunay problema sa pangisip.

Dili type ni Ruffa

Giangkon sa former beauty queen Ruffa Gutierrez nga laayan siya makigrelasyon og maguwang pa niya nga lalaki. "Mga matatanda boring eh!" tsika pa sa aktres sa  interview niya sa programang "Aquino & Abunda Tonight" .

Maegan mibanat og maayo

 "Pulot sa Mindoro! Yuck!'Kini maoy gipamulong sa anak ni Freddie Aguilar nga si Maegan ngadto sa menor de edad nga asawa sa beteranong singer. Gikatahong gipalayas si Maegan sa amahan niini human sila nagkasumapaki gumikan sa nadaot nga utanon.

Nahupas na gyud

Gipadayag ni Raymart Santiago nga dugay na nga nahupas ang iyang gugma ngadto kang Claudine Baretto busa wala siya'y plano nga makigbalik niini. Misamot ang kalagot ni Raymart ngadto kang Claudine human gidid-an siya niini nga makakita sa ilang anak.

Personal nga problema

Gipadayag ni Freddie Aguilar nga naguol siya sa  gibuhat sa iyang anak nga si Maegan kinsa namulong og dili maayo ngadto kaniya. Suma pa sa singer nga problema unta kini sa ilang pamilya ug dili na angayan nga iyagyag pa sa kadaghanan.-

Nagkalawom ang relasyon?

Suhito na si Louise delos Reyes sa batasan sa iyang leading man sa Kambal Serina nga si Aljur Abrenica. Nagkasuod na sila og maayo samtang nagdagan ang maong pantaserye. Padayon nga gihimakak nila ang istorya nga matud pa nagkasinabtanay na silang duha.-Junas Flores, CNU Comm Intern (BANAT NEWS)