Mga doktor ni Napoles
Tua ra. Nakakita na sab og lusot si Janet Lim Napoles, ang gipasanginlang utok sa P10 bilyones nga pork barrel scandal, aron kapugngan ang pagpatuman sa korte nga ibalik na siya sa Fort Sto. Domingo sa Laguna. Usa ka adlaw human nimando si Makati City Regional Trial Court Judge Elmo Alameda nga pagawason na siya sa Ospital ng Makati (OsMak) karong semanaha, nikalit lang og pangangkon si Napoles nga nagdugo diay ang hiwa sa operasyon pagkuha sa bugon sa iyang tagoangkan.
Wa hinuoy bisan usa nga motuo ni Napoles. Sama sa iyang listahan nga way ebidensiya, gisalikway ang labing bag-ong pangangkon ni Napoles nga laing pamakak ug maniobra.
* * *
Hinaot nga wa nay magpailad ni Napoles. Kay di gyod siya magnihit og mga paagi paglingkawas gikan sa pagkatanggong, sama nga mas abunda ang mga salida nga pasiugdahan aron makalikay sa bug-at nga silot sa mga kasong kriminal nga gipasaka batok niya.
Hinumdomi nga sa adlaw sa pagsugo sa korte nga pagawason siya sa OsMak nakaako pa og panghudlat ang iyang mga abogado nga mahimong di matiwas ang gipasalig ni Justice Secretary Leila de Lima ug gipaabot sa Senate Blue Ribbon Committee nga iyang affidavit nga mag-detalye sa tanang transaksiyon sa pork barrel nga iyang giduma kun ihinayon siya pagbalik sa Laguna.
* **
Nipadayag sab og kabalaka si Napoles sa iyang seguridad kun ibalik sa Fort Sto. Domingo. Bahala na kun bisan gamay’ng bata ang pangutan-on mosulti gyod nimo nga mas luwas kay sa ospital sa tungatunga sa usa sa labing siot nga dakbayan ang kampo sa kapolisan nga nalayo gikan sa ubang kabalayan.
Mahimo sang mangangkon si Napoles nga duna siyay laing bugon. Mahimo ganing moinsistir na sab nga nilayat pag-ayo ang iyang presyon ug asukar sa dugo. Nga iya nang gisuwayan sa unang mga adlaw sa pagkatanggong sa Fort Sto. Domingo. Hangtod nga nasakpan sa mga guwardiya nga gituyo diay ang wa pagtomar sa iyang mga tambal.
* * *
Kinahanglan nga pamatud-an ni Napoles nga nagdugo siya ug nga mameligro ang iyang kinabuhi kun pagawason sa OsMak. Masusi lang ang tinuod niyang kahimtang pinaagi sa mga doktor sa gobyerno nga di niya kakonsabo.
Kay may sukaranan ang mga pagduda sa kaligdong sa pribadong mga doktor nga binayran ni Napoles. Sila ang samang mga doktor nga gipasanginlan nga nag-apura pag-opera ni Napoles bisan kun ang bugon nga nakit-an sa ultrasound labihang gamaya, way bisan unsang hulga sa kanser ug busa layo ra kaayo gikan sa patyanan. Unsaon man nimo pagsalig sa mga doktor nga nisupak sa pagpabalik ni Napoles sa Laguna di tungod sa iyang kahimsog kun dili tungod kay mas layo nang ilang biyahe pagsusi sa kinaham nilang pasyente.
- Latest
