Balay ug yuta gusto nga ihatag sa kamanghurang anak

Dear Atty. Divine,

Naa lang unta koy  ipatambag nimo kabahin sa yuta sa akong ginikanan. Lima mi ka magsuon unya ako’y kinamanghuran, minyo na tanan akong mga maguwang. Gusto unta sa akong ginikanan nga ihatag nila kanako ang balay ug yuta isip bayad nila sa pagserbisyo nako sa akong mama kay paralize man ug unya di man ko patrabahuon ni papa kay ako ra kuno atiman sa  akong mama. Unsa may maayo buhaton aron mamahimong legal ang paghatag nila sa yuta nako.Unta imo ko matabangan. — Eva

Dear Eva,

 Kun gusto sa imong mga ginikanan nga bisan karong buhi pa sila ma-transfer na sa imong pangan ang ilang balay ug yuta mamahimo silang mo- execute og Deed of Donation alang sa pagdonar sa maong property nganha kanimo. Ang maong Deed of Donation imong iduso sa BIR aron sa pagbayad og Donor’s Tax aron imong ma-process ang pag-transfer niini ngadto sa imong pangan sa Tax Declaration ug sa Titulo. Wa nimo mahisguti kun ang imong mga ginikanan aduna bay laing property gawas sa inyong house and lot. Mas maayo man gud nga atong masayran kay kun pananglitan mawala na ang imong mga ginikanan kamong lima ka igsuon kamo may mo-inherit sa ilang kabtangan in equal share ug kanang house and lot nga iyang gihatag kanimo makonsiderar kana nga imong advance share ug kun wala na ang imong mga ginikanan apilon kana sa pag-inventory isip kabahin sa ilang kabtangan. Kun pananglitan way laing property ang imong mga ginikanan gawas sa house and lot ug mawala na sila sa kalibutan, ang imong upat ka magsuon dunay katungod nga mangayo sa ilang share sa maong house and lot. Apan kun aduna moy laing property kadtong nahibiling property mao sab to ang ilang bahinon apan kun mas dako ang imong bahin tungod sa value sa house and lot hayan imo gyud silang bayran sa ilang kuwang nga share. Hinuon kun way pagsupak ang imong upat ka magsuon sa paghatag nganha kanimo sa inyong house and lot then mas maayo ug dili ka angay nga maproblema niini. Ang imong buhaton karon mao ang pagduol og abogado aron sa pagpahimo og Deed of Donation. Apan kun gusto sa imong ginikanan nga ma-transfer ang ownership sa ilang house and lot sa higayon nga wala na sila sa kalibutan then ang ilang himuon mao ang Last Will and Testament apan kinahanglan nga ang laing upat ka anak dili sab nila hikawan sa ilang share. Thanks and God Bless. — Atty. Divine