Habal-habal kaabag sa kinabuhi

CEBU, Philippines - Lisod ang panahon karon kun wala kay trabaho. Ang pagdrayb og motorsiklo nga “habal-habal” ang usa sa mga sayon nga panginabuhian karong mga panahona. Kung anaa lang kay motor ug kun kahibalo lang ka nga mu-drayb, pwede na kaayo ka nga manginabuhi pinaagi sa pagpamasahero.

Dili masayon-sayon ang trabaho sa usa ka drayber kay obligasyon ug responsibilidad ang kinabuhi sa mga pasahero. Ang mga habal-habal kasagaran anaa makit-an sa mga lugar nga menos ang mga jeep ug bus nga moagi kon sa mga dapit nga habal-habal ra ang makaagi. Usa sa mga hinungdan sa pagdagsa sa mga habal-habal mao ang mga gubaon ug wala mahuman nga agianan ilabina sa mga bukiran nga dapit.

Risgo ang pagsakay sa habal-habal kay ang uban sa mga drayber wala may mga helmet nga ipasul-ob sa ilahang mga pasahero ug uban pa gani tulo hangtud sa lima ang masakay sa habal-habal. Ang mga pasahero mapugos og sakay kay habal-habal ra man ang ilahang pwede nga masakyan aron nga makaabot sa ilahang padulngan.

Kadaghanan sa mga draybers dili kontento sa pag drayb-drayb lang apan dako kaayo ni og natabang sa ilahang pangadlaw-adlaw nga panginahanglan. Wala sila’y mahimo kay kini ang usa sa  ilahang nakita nga pamaagi aron mabuhi, kay kasagaran kanila wa maka graduate og high school o high school graduate ra ang nahuman.

Matud ni Ronald Gumapon, 20, nga daghan unta siya og mga pangandoy sa kinabuhi apan tungod sa ka-apeke sa kwarta napugos na siya og pagdrayb arun nga makatabang sa iyahang mga ginikanan. Ug  rason sa kadaghanan kanila, nag drayb sila para sa ilahang pamilya.

Di kaayo dako ang kita sa pagdrayb og habal-habal, adunay mga adlaw nga gamay ra ang kita kay mingaw  ug usahay dako usab ilahang kita. Mukabat og mga 300 pesos ang kita nila sa inadlaw ug igo-igo ra usab para sa ilahang pamilya.

Dako og tabang ang habal-habal sa komunidad ilabina katung mga nagpuyo sa bukiran nga dapit. Dili lang kay sa komunidad, apil na ang mga drayber niini kay sa habal-habal sila nikuha og para sa inadlaw nga panginahanglan. (BANAT NEWS)