Ex-convict kinatay, itinapon sa ilog

MANILA, Philippines - Natagpuang lumulutang sa ilog at  tadtad ng saksak ang bangkay ng  isang 35-anyos na miyembro ng Batang City Jail  (BCJ)  na nakasuot lamang ng underwear sa may Road 10, Vitas, Tondo, Maynila, kahapon ng umaga.

Kinilala ang biktimang si Anthony Herrero, naninirahan lamang  sa gilid ng estero ng Road 10 sa Vitas Tondo.

Sa ulat ni Carlito Siy ng Manila Police District-Homi­cide Section, dakong alas- 6:30 ng umaga kahapon nang madiskubre ang lumulutang na bangkay na may suot lamang na brief.

Pahayag ng tiyahin na si Rosalia Timoteo, 66, nagpa­alam sa kanya ang biktima dakong alas-11:00 ng gabi noong nakaraang Martes na may bibilhin lamang pagkain mula noon ay hindi na ito nakabalik hanggang sa makita nga ang bangkay nito na lumulutang sa ilog.

Sa imbestigasyong nakalap ng pulisya, noong nakaraang Agosto ng nakalipas na taon lamang nakalaya sa Manila City Jail  ang biktima sa kasong holdap.

Hindi pa tukoy ang suspek o sinumang responsable sa krimen kaya patuloy pa ang isinasagawang imbestigas­yon ukol dito.