Mayor sa DaanBantayan gikiha sa 10 ka kapitan sa barangay

CEBU, Philippines - Ang mayor sa DaanBantayan apil ang bise mayor ug tulo ka konsehal sa lungsod gipasakaan og kaso didto sa Ombudsman-Visayas kay gipasanginlan nga adunay gipili sa paghatag og tabang sa mga nabiktima sa bagyo’ng Yolanda.

Duha ka kaso ang gipasaka didto sa Ombudsman apan susama ra ang pasangil nga ang mga sinumbong nakahimo og grave abuse of authority, conduct unbecoming of a government official, dishonesty ug uban pa.

Sa usa ka kaso nga gipasaka didto sa Ombudsman kaniadtong Marso 27, si Mayor Augusto Corro lang maoy gikiha sa napulo ka kapitan sa lainlaing barangay sa Daanbantayan.         

Ang mga kihanti mao sila si Kapitan Leticia Perpetua sa Barangay (Pajo); Francisco Rosalejos (Malingin); Pablo Arcenal Jr. (Tinubdan); Herminia Castro (Calape); Isidro Rodrigo (Tominjao); Ali Abucay (Maya); Zenaida Arriesgado (Agujo); Rez Novabos (Logon); Ramon Camino (Carnaza) ug Remedios Layos (Lanao).

Ang laing reklamo gipasaka batok ni Mayor Corro, uban ni Bise Mayor Gilbert Arrabis ug sa tulo ka konsehal nga sila si Chona de Leon, Juanito Ybañez ug Manny Benatiro.

Ang mga mipasaka og kaso mao ang napulo ka molupyo sa Sitio Backyard, Poblacion, Daanbantayan. Sila mao si Linda Coyoca, Cherry Burlas, Leake Ronald Eduard Jr., Hdeliza Rondina, Leonora Calipay, Marilyn Rondina, Florencia Rodrigo, Jocelyn Rondina, Geraldine Calipay ug si Mercedita Almocera.

Pareho ra ang ilang reklamo nga si Mayor Corro bayas kon adunay gipili sa paghatag og tabang sa mga biktima sa bagyo’ng Yolanda ug ang gihatagan matud pa ang iya ra’ng mga dumadapig.

Ang mga kapitan nga mireklamo mipasangil nga wala gayud sila mahatagi tungod kay bulgar kaayo sila nga didto mikampanya ni kanhi mayor Marilou Loot nga gipilde ni Corro sa eleksyon.

Matud sa mga kapitan nga ang ilang nahibaw-an ang mga dumadapig ni Corro gipanghatagan og daghan nga pligo sa sin ug ubang construction materials apan sila wala.

Si Mayor Corro gikontak ning tigbalita  ug mitataw nga wala pa siya makadawat og kopya sa reklamo apan gihulagway niya nga pamolitika na usab ang pagpasaka kaniya og kaso.

Matud ni Corro nga kun aduna may wala mahatagi nagumikan kana kay tungod sa kadaghan sa tabanganan dili ang tanan maoy mahatagan.

Ang mayor miingon nga andam siya nga motubag sa mao nga reklamo nga gihulagway niya nga gimugna sa iyang mga kontra sa politika.

Si Mayor Corro miingon nga ang DaanBantayan may giila na nga tulo ka barangay nga adto ipahimutang ang “resettlement housing” nga kapin sa 400 ka balay.

Matud ni Corro nga ang iyang administrasyon nakahatag na og mga sin sa 10,767 ka panimalay nga katunga na sa 21,500 ka balay sa Daanbantayan.   (BANAT NEWS)