Duha ka Cebuana mokumbati
CEBU, Philippines - Duha ka Sugbuanang tennis players ang gidapit pagsalmot sa 3rd National Men's and Women's Invitational Tennis Tournament sa Marso 13-16 didto sa Woodridge Tennis Club courts sa Maa, dakbayan sa Davao.
Sila si Sally Mae Siso ug Hanna Espinosa ang gikatakdang mopakita sa ilang katakus sa tulo ka adlaw nga torneyo nga nagtangag og P216,000 nga ganting salapi ngadto sa mga mananaog. Usa usab kini sa mga dagkung kalihukan sa "Araw ng Dabaw" festival.
Kini unya ang ikaduhang higayon ni Siso nga mopakita'g aksiyon sa maong kompetisyon ug labing una ni Espinosa.
Sila si Siso ug Espinosa malipayon nga giimbitar sa torneyo diin mopakita sab og aksiyon ang mga banggiitang men's players dinhi sa nasud nga pangulohan ni Johnny Arcilla, kansang kaliwat naggikan sab sa Sugbu.
Sa unang pagsalmot ni Siso sa maong torneyo gikasangka dayon niya si Clarisse Patrimonio, kinsa niadtong higayona maoy No. 1. Hinuon, si Siso nakahimo gihapon pagbitbit og runner-up trophy sa women's doubles diin iyang gikapares si Aileen Rogan.
Sa iyang bahin, si Espinosa naghinam-hinam na sa maong torneyo ug nanghinaot makauban niya'g duwa si Siso sa doubles. Ang duha dugay nang nagpares sa dihang nagtungha pa sila sa elementary ug sekondarya, ilabi na sa regional meets ug sa Palarong Pambansa.
Hinuon, ang duha dili makabuot sa ilang pares sa women's ug mixed doubles event kay ipaagi man kini sa bunot.
Si Arcilla sa iyang bahin, nangandam na'g maayo alang sa maong torneyo kay tuyo niya nga ma-grandslam sa men's singles. Si Arcilla nidaog sa unang pagpahigayon sa maong torneyo niadtong 2011 ug nadepensahan niya kini niadtong 2012. Walay torneyo nga gipahigayon sa miaging 2013. (BANAT PALARO)
- Latest
