Estriktong balaod sa armas

Makalilisang nga report ang mitay-og sa Sugbo kagahapon human gi-ambush patay si Atty. Noel Archival sa barangay Corro, lungsod sa Dalaguete kagahapon sa sayong kahaponon.

Patay dihadiha ang ilado nga abogado nga sakay sa iyang Ford nga SUV sa dihang gibanhigan sa barangay Corro, lungsod sa Dalaguete kagahapon sa ala una sa hapon.

Sa pagsulat ning Tikdol, wala pa hinuon ma-utingkay sa mga sakop sa Scene of the Crime Operation (SOCO) ang sakyanan diin nagbay-ad si Archival sa iyang gilingkoran. Kini aron masayran kun aduna ba gyu’y armas nga gidala ang abogado ug mga kaubanan kinsa gikan sa Dumaguete City nag-atender og hearing.

Buot nakong mahibaw-an kun nagdala ba og armas ang abogado ug iyang mga kaubanan samtang nagbiyahe paingon sa Dumaguete ug balik dinhi sa Sugbo.

Mitumaw karon ang pagkuwestiyon sa mga “netizens” sa bag-ong balaod, ang Republic Act No. 10591 kon Act Providing for a Comprehensive Law on Firearms and Ammunition and Providing for Violations Thereof tungod sa ka-estrikto niini, ilabi na ang pag-release sa Permit to Carry Firearms Outside Residence (PTCFOR) ang permit nga magtugot sa gun owner nga makadaladala sa armas gawas sa panimalay.

Daan na nga gisaway kining maong balaod tungod kay matud pa mopabor kini sa mga kriminal.

Tinuod kini. Samtang estrikto kaayo ang paghupot og armas ngadto sa mga responsableng mga Pilipino, walay bag-ong balaod nga maggukod sa mga kriminal nga mogamit og armas o magpabug-at sa silot sa mga kriminal nga mohimo og krimen ginamit ang armas nga walay lisensiya ug PTCFOR.

Ang trabaho sa mga abogado, sama kanamo nga mga sakop sa media, usahay mobutang sa among kinabuhi ngadto sa kakuyaw, ilabi na kun adunay mga tawong dili makagusto sa among trabaho.

Ang Pilipinas usa sa mga nasud nga nag-una sa talaan sa United Nations sa mga nasud diin ang kinabuhi sa mga sakop sa media nag-ungaw sa kakuyaw.

Apan diha sa bag-ong balaod, walay espesyal nga prebilihiyo alang sa mga sakop sa media paglukat og armas ug permit to carry.

Mao kini ilang giingon nga mas maayo pa ang mga gun for hire libre nga makadaladala og armas nga walay gibating kakuyaw (kay kining ingon niining mga kriminal dili mahanugnan sa ilang kinabuhi kun madakpan ug mapriso), apan kaming mga sakop sa media naglakaw nga walay armas kay estrikto ang balaod.

Makatuo lang hinuon kita nga ang kapolisan ug ang kriminal kakunsabo ra o adunay mga opisyal sa polis nga nagbuhi og mga kriminal.