Kinsay dunay apason?
Kun adunay naghinam-hinam sa away nila ni Manny Pacquiao ug Timothy Bradley, walay lain kun dili silang duha mismo. Kini gumikan kay nakataya niini ang ilang karera ug mag-agad niini kun si kinsa ang mosunod pa nilang makasangka. Of course, hasta sa ilang kasikat ug legasiya sa boksing.
Kun si Bradley ang modaog, makahagit kini sa uban pang mga inila sa maong weight division, magpabilin sab iyang kasikat ug natural, hasta ang kwarta.
Labaw sa tanan, maputol na ang nag-umido nga pagduha-duha sa mga boxing fans sa iyang abilidad ug mismo sa iyahang konsensya kabahin sa una nilang panagsangka niadtong 2012.
Matud niya sa usa ka news report, kun himatyunon siya karong mga panahona ug kun may usa siyang pangayuon sa dili pa siya mabugtoan sa ginhawa, ang "rematch" ra gyud nilang duha ni Pacquiao maoy iyang gusto.
Apan kun makadaog man ugaling si Bradley sa ikaduhang higayon, sigurado ko nga dili kini exciting ug makapalagot lang sa mga fans.
Kay si Bradley pure boxer, "hit and run" ang estilo ug dili mosugal. Kun ambisyonon niyang patumbahon si Pacquiao, kinahanglang isugal niya ang iyang apapangig.
Nasayod man daan si Bradley nga usa siya sa labing hinay og apapangig sa maong dibisyon, mao nga bisan ingnon pa nga "sukol-dagan" iyang estilo basta sa katapusan siya'y modaog, kadaugan gihapon kini, "a win is a win" matud pa.
Unya dili na usab kaayo makurat o matingala pa ang boxing fans sa resulta, kay mahimo man nga si Pacquiao maoy han-ukan sa basol.
Kay mibahar na iyang bertud sa boksing, nanalaw na, nagkatiguwang na, na-busy na sa politika, tax cases ug uban pang pwedeng irason kun nganong napilde siya sa ikaduhang higayon kang Bradley.
Sa ato pa, si Pacquiao maoy dunay apason sa Abril 12. Kinahanglang mabawi pagbalik iyang bakus kang Bradley. Ipakita nga sayop gyud ang judging niadtong 2012 ug kinahanglang impresibo siyang modaog pinaagi sa usa ka knockout aron di siya tawgong "laos."
Kun mahimo kini ni Pacquiao, 2-2 na ang iyang standing sa mata ni Floyd Mayweather Jr. nga hangtod karon lihay pa sa manatad.
Duha ka impresibong kadaugan kang Brandon Rios ug Bradley makapapas na sa "bad memories" sa nahitabo kaniya kang Juan Manuel Marquez.
* * *
PAGTULON-AN: "I learned that courage was not the absence of fear, but the triumph over it. The brave man is not he who does not feel afraid, but he who conquers that fear."
-- NELSON MANDELA, former South African President
- Latest
