Nagpaabot og dugang ‘milagro’

CEBU, Philippines - Padayon ang pagdagsa sa mga tawo nga nagpaabot  og dugang milagro sa imahen ni Senyor Santo Niño sa Saac, barangay Mactan dakbayan sa Lapu-Lapu nga giingong nakig-estorya sa tulo ka bata nga nakapunit niini. Usa kanila si Zaldy Parame, 57, taga  Calajoan, Minglanilla nga usa ka taxi drayber nga nahinabi sa Banat News miingon nga alas-4 pa sa kaadlawon siya milinya kay nagpaabot sa mga tawong midugok sa maong imahen.

Matud niya upat ka mga mga tawo gikan sa gitukod nga kapilya ang nanakay niya ug nagpahatud sa Mandaue, tungod sa nadunggan niyang mga estorya sa mga pasahero, mibalik siya dayon sa Mactan aron managkot. Si Parame namasin nga pinaagi niini ug sa iyang pag-ampo makalakaw na ang iyang  6-anyos nga anak nga hangtod karon dili pa gihapon makamaong molakaw.

Si Janeth Balermo, 41, inahan sa usa sa mga batang nakakaplag sa imahen mibutyag sa Banat News nga dili lang ang imahen maoy hikapon sa mobisita sa ilang dapit kay hasta ang iyang anak.

Matud pa ni Balermo, dihay usa ka babaye nga mihikap sa iyang anak ug nag-ampo  nga mamaayo sa iyang mga buyag-buyag sa panit. Matud pa niya nagtuo ang maong babaye nga mihikap sa iyang anak nga gitugahan kini ni Senyor Santo Niño.

Ang mga bata nangangkon nga nakig-estorya nila ang imahen dihang ilaha kining napunitan.

Si Ramil Arellano nga nagtrabaho sa MEPZA isip sastre nga maoy amahan sa laing duha ka mga bata nga sila si Shamil, 6 ug KG Ace, 4, mibutyag nga dunay mga mibisita sa kapilya nga mi-post sa facebook ug nabalita kini maong midaghan ang mga tawo.

Si Padre Benjie Balsamo, padre kura sa Mactan Parish Church nga nahinabi sa mga tigbalita miingon nga ang simbahan mohimo og pakisusi kun tinuod ba o dili ang giingong ‘milagro.’ (BANAT NEWS)