Duha ka polis nga nakigsukmagay sa kauban girelibohan

CEBU, Philippines - Girelibohan sa katungdanan ug gidis-armahan ang duha ka mga polis sa Presinto 3 sa Mandaue City Police (MCPO) nga gialigar nga nanukmag ngadto sa ilang desk officer sa sulod sa ilang buhatan.

Kini ang nasayran sa Banat News kang Senior Superintendent Petronille Baldebrin, director sa MCPO nga nahinabi kagahapon.

Matud pa niya nga human makasumitir ngadto sa iyang buhatan ang hepe sa Presinto 3 nga si Senior Inspector Genilo Veraque og report girelibohan dayon sila si PO2 Salvador Pogoy ug PO1 Ronaldo Manlangit.

Gialigar ni SPO1 Antonio Cabezares nga samtang nagkuha pa siya og mga impormasyon sa suspek nga si Victoriano Maneja nga dinakpan sa duha aron i-blotter, giingong pugsanong gidala sa duha ang ilang dinakpan sa  ilang opisina sa intelligence section bisan wa pa mahuman si Cabizares.

Ang maong suspek gireklamo sa kapuyo nga nangulata ug nasakmitan pa og armas nga way lisensya. Apan dihang giapas ni Cabezares ang duha, matud pa nangasuko sila ug mitumaw ang kagubot diin giingong nasukmagan si Cabizares ni Pogoy.

Si Baldebrin miingon nga ang duha ka mga polis  gidis-armahan ug gibutang sa City Public Company sa ilang headquarters sa MCPO apan nagpabilin si SPO1 Cabezares sa Presinto 3 kinsa mi-file usab  og leave niining panahona.

Gipasabot ni Baldebrin nga kun kapamatud-an ang duha ka mga polis nga sayop ang ilang gihimo maoy ilang atubangon ang kasong administratiba human usab sa imbestigasyon nga pangulohan ni Senior Inspector Jimmy Portes sa IDMB sa MCPO.

Si Senior Inspector Portes nga nahinabi sa Banat News miingon nga gisugdan na karon nila sa pag-evaluate ang investigation report  ni Veraque.

Gitataw niya nga kun ilang makita nga adunay probable cause ang gipadangat nga reklamo ni Cabezares ilang iduso ang kaso ngadto sa buhatan ni Senior Superintendent Armado Radoc nga maoy hepe sa Regional Investigation Detection and Management Bureau sa Police Regional Office (PRO) 7 alang sa summary hearing. (BANAT NEWS)